Dili, 02 Setembru 2024- Iha primeira semana fulan Setembru 2024, funsionáriu ho estrutura dirijente másimu hosi Ministériu Interior, Sekretaria Estadu Protesaun Sivíl, Autoridade Protesaun Sivíl (MI-SEPC-APC) realiza serimónia Isar Bandeira iha resintu Ministériu Interior, Vila-Verde.
Sua Exlénsia Sekretáriu Estadu Proresaun Sivíl, Domingos Mariano Reis sai inspetór hodi prezide serimónia Isar Bandeira husu ba funsionáriu MI-SEPC-APC atu dixiplina no atu kontribui asegura seguransa durante vizita Sua Santidade Papa nian mai iha Timor-Leste.
“Ohin iha mensajén tolu atu hato’o ba ita-boot sira; primeiru mantein dixiplina hahú hosi funsionáriu kik to’o kargu xéfis sira hotu, mensajén segundu ita hotu hatene iha dia 09 to’o 11 Setembru 2024, ita hotu hein vizita Sua Santidade Papa nian mai Timor-Leste. Ministériu Interior nuudar pilár importante iha Sistema Seguransa Nasionál, husu ita hotu tenke asegura seguransa iha ita-nia rain liu-liu ho vizita Sua Santidade Papa nian,” mensiona SEPC.
Iha okaziaun ne’e, SEPC husu ba funsionáriu MI-SEPC-APC, bainhira hetan informasaun ruma kona-ba ema ruma atu kria problema no instabilidade ho grau kik ka boot husu atu informa Xefe Seksaun, ba Xefe Departamentu no ba Diretór sira hodi kanaliza lalais informasaun ba komandu no seguransa sira hodi halo intervensaun.
Sekretáriu Estadu mós apela funsionáriu sira tenke partisipa ho másimu iha misa Tasi Tolu hosi Sua Santidade Papa, funsionáriu sira atu mobiliza família, viziñu no komunidade sira. Tanba ne’e Xefe Seksaun, Xefe Departamentu no Diretór sira tenke kontrola ninia funsionáriu hotu partisipa obrigatóriu misa iha 10 setembru 2024.