Manatuto, 16 Setembru 2024-Prezidenti Autoridade Protesaun Sivíl (APC) Munisípiu Manatuto lidera hus Komandante Afonso Soares da Silva akompanña husi Komandante Korpu Bombiros Domiber T.D.N Soares ho0 estrutura APC tomak simu vizita ofisiál husi Sua-Exelénsia Prezidenti Autoridade Protesaun Sivíl; Jesuino dos Reis Matos Carvalho ho komitiva, iha edefísiu Korpu Bombeiros Munisípiu Manatuto.
“Ne’e ha’u nia planu, wainhira ha’u simu posse, molok asume kna’ar ida ne’e, hau hakarak hatene ita bot sira, antes de hau hatudu liman, antes de hau orienta ba imi hotu nudar membrus estrutura iha baze, hakarak hatene uluk imi nia kondisaun servisu durante ne’e lao oinsa?” , dehan Prezidenti APC Jesuino dos Matos Carvalho.
Perante estrutura no funsionárius tomak APC Manatuto nian, lideransa másimu APC ne’e, promete katak depois de vizita ofisiál ne’e, sei tur hamutuk ho estrutura nasionál sira par oinsa atu responde preokupasaun no dezafiu sira ne’ebé durante ne’e membro sira enfrenta.
“ Agora ne’e ha’u mai hamutuk ho imi, hau lori diretór sira ne’e mai atu mai rona direitamentu imi nia preokupasaun sira, hodi trasa planu ida hadian faze por faze ita lao ba oin”. Tenik Prezidenti APC Jesuino dos reis Matos Carvalho.
Nia hatutan, maske Autoridade Protesaun Sivíl foin harii tinan rua resin, maibé servisu iha dirasaun sira hanesan Bombeiros, dezastre laos buat foun, ates ne’e lao hela ona tamba iha vontade servisu ne’ebé diak no responsabilidade.
“Hau fiar imi hotu matenek, imi hotu bele, durante ne’e tau imi nia-an iha instituisaun ida ne’e, servisu ho fuan ho laran mezmu ho rekursu ne’ebé mak menus. Imi mós iha vontade di’ak, simu kna’ar ida ne’e, maske iha udan laran no loron manas, durante ne’e imi halao tiha ona”, hatutan Prezidenti APC.
Prezidenti APC ne’e, kontinua husu ba kargu xefia no estrutura tomak atu servisu ho pasiensia, servisu iha ekipa no kuda espíritu iha Instituisaun APC ne’e.
Iha sorin seluk Komandante APC Munisípiu Manatuto, Afonso Soares da Silva hato’o nia agradese wain ba vizita Prezidenti APC-TL mai iha APC Munisípiu Manatuto hodi rona no hare’e rasik preukupasaun sira ne’ebé durante ne’e hasoru husi APC Manatuto.
Ikus liu Prezidenti APC mós hatutan katak ba superior sira atu nafatin trata ema hanesan ema ne’ebé sai hanesan motto prinsipál iha nia knaar.
Iha vizita ofisiál Prezidenti APC; Jesuino dos Reis Matos Carvalho ho komitiva fó pin responsabilidade ba Komandante APC Munisípiu Manatuto no Komandante Korpu Bombeiros hafoin halo mós observasaun direita ba ekipamentu eskritóriu servisu administrasaun APC nian, armajén no hare’e rai hekares rua ne’ebé atribui husi Estadu hodi hari’i edefísiu integradu APC iha futuru.
Vizita ofisiál Prezidenti APC Jesuino dos Reis Matos Carvalho akompaña husi Diretór Gabinete Relasaun Externa no Komunikasaun ; Cesario da Silva Marques, Diretora Gabinete Inspensaun no Auditoria Inspetora; Odete Calado, Diretór Diresaun Nasionál Jestaun Risku Dezastre; Francisco Fátima da Cruz, Diretór Nasionál Bombeiros; Paul Aníbal Maia, Diretór Nasional ba Prevensaun no Mitigasaun; Carlos da Costa , Komandante Unidade Espesiál Protesaun Sivíl; Fernando da Costa.
Geny Média APC Manatuto.