𝐔𝐍 𝐖𝐎𝐌𝐄𝐍 𝐊𝐎𝐍𝐓𝐈𝐍𝐔𝐀 𝐀𝐏𝐎𝐈𝐔 𝐒𝐄𝐏𝐂-𝐀𝐏𝐂 𝐋𝐈𝐆𝐀 𝐁𝐀 𝐏𝐀𝐑𝐓𝐈𝐒𝐈𝐏𝐀𝐒𝐀𝐔𝐍 𝐅𝐄𝐓𝐎 𝐈𝐇𝐀 𝐑R𝐃

Dili, 20 Setembru 2024-Sua Exelénsia Sekretáriu Estadu Protesaun Sivíl, Domingos Mariano Reis ho Xefe UN Women iha Timor-Leste, Amy Nishtha Satyam formaliza asinatura nota entendimentu hodi kontinua apoiu Autoridade Protesaun Sivíl (APC) foku liubá “Partisipasaun Feto Timor Oan iha Redusaun Risku Dezastre (RRD) no Empoderamentu Ekonómiku Feto ba Rezilénsia Klimátika,” iha Timor-Leste.

Apoiu ne’ebé UN WOMEN fortalese ba SEPC-APC ho durasaun tinan 3, hahú hosi tinan 2024 to’o 2027, kobre munisípiu Ermera, Vikeke no Covalima, ne’ebé sei foku liubá área importante haat; 1) suporta téknika dezenvolvimentu rekursu, formasaun sira kona-ba redusaun risku dezastre no feto sira rezilénsia klimátika, 2) fornese kapasitasaun redusaun dezastre ba inan feto sira, 3) fornese kapasitasaun empoderamentu ekonómia feto ba rezilénsia klimátika, 4) suporta SEPC-APC ba iha implementasaun no dezenvolvimentu Planu Asaun Nasionál nomós Matadalan Politika ne’ebé Sensivel ba Jéneru.

Sua Exelénsia Sekretáriu Estadu Protesaun Sivíl, Domingos Mariano Reis iha entrevista hateten asina akordu entre UN WOMEN ho Protesaun Sivíl atu hasa’e kapasidade feto nian hodi responde bainhira iha situasaun dezastre.

“Ohin Ami asina akordu ho UN WOMEN hodi fortalese koperasaun entre UN WOMEN ho Protesaun Sivíl intermu kapasitasaun ba feto sira, bainhira dezastre akontese feto sira prepara ona atu bele responde no rekopera ba sira-nia an no família,” esplika SEPC.

Sekretáriu Estadu haktuir bazeia ba relatóriu anuál Timor-Leste lakon riku so’in sira por volta 5.9 milloens dolár por kauza dezastre. Tanba ne’e Protesaun Sivíl establese koperasaun ho parte hotu oinsa bele halo redusaun ba risku dezastre.

Governante ne’e subliña ho koperasaun servisu hamutuk ne’e ninia planu prioriedade ida mak atu kapasita feto sira no hasa’e koñesimentu kona-ba kauza dezastre, sinais dezastre, oinsa atu prevene, oinsa atu kuidadu-an, bainhira dezastre akontese, atu prepara feto ne’ebé reziliente hasoru dezastre.

Iha fatin hanesan, Xefe UN Women iha Timor-Leste, Amy Nishtha Satyam hato’o agrdese no grande gratidaun ba SEPC ne’ebé mak loke ona odamatan ba iha kolaborasaun hodi konkretiza liu hosi serimónia asinatura nota entendimentu entre SEPC ho UN WOMEN foka liubá “Partisipasaun Feto Timor Oan iha Redusaun Risku Dezastre no Empoderamentu Ekonómiku Feto ba Rezilénsia Klimátika”.

Responsavél UN WOMEN haktuir iha estudu no referénsia hatudu katak bainhira dezastre akontese ida ne’ebé sai vítima barak liu mak inan feto sira.

“Dala barak ita ko’alia kona-ba feto ita haree sira hanesan mós problema, maibé sira mós bele sai hanesan solusaun. Tanba ne’e asinatura SEPC ho UN WOMEN atu servisu hamutuk foka liubá área importante haat; 1) suporta téknika ba iha dezenvolvimentu rekursu no formasaun sira kona-ba redusaun risku dezastre no feto sira rezilénsia klimátika, 2) fornese kapasitasaun kona-ba redusaun dezastre ba inan feton sira, 3) fornese kapasitasaun empoderamentu ekomomia feto ba rezilénsia klimátika, 4) suporta SEPC-APC ba iha ninia implementasaun no dezenvolvimentu Planu Asaun Nasionál nomós Matadalan Politika ne’ebé Sensivel ba Jéneru,” esplika Xefe UN WOMEN iha Timor-Leste.

Nia mós fundamenta liu hosi asinatura nota entendimentu ida ne’e la’os sai de’it dokumentu sira, maibé tenke tau iha prátika, tenke implementa atu konkretiza ida ne’e hodi tulun inan feto sira iha área remotas hodi nune’e sira ho forsa hodi hasoru no reziliente iha mudansa klimátika.

Hafoin asinatura, Xefe Seksaun Komunikasaun GREK-APC, Agustinho Cosme Belo aprezenta mós konteúdu implementasaun projetu ninia tarjetu ba feto, mane labarik.

Entretantu, partisipa iha selebrasaun akordu ne’e asiste direita hosi Reprezentante Sekretária Estadu Igualdade (SEI), Prezidente APC, Jesuíno dos Reis de Matos Carvalho, Komandante Nasionál Operasaun Protesaun Sivíl, Superintendente Asistente Polísia, Nuno Romualdo Gomes, Diretór Ezekutivu, Diretór Gabinete, Diretór Nasionál, Xefe Gabinete no Xefe Unidade sira iha APC.

#Cipriano & Frederico.