RAEOA, 04 Outubro 2024_Prezidente Autoridade Protesaun Sivíl (APC), Jesuíno dos Reis de Matos Carvalho akompaña hosi Diretór Gabinete no Diretór Nasionál kontinua hala’o vizita traballu hodi hasoru malu ho estrutura APC RAEOA atu rona sira-nia preokupasaun.
Prezidente APC, Jesuíno dos Reis de Matos Carvalho hateten vizita traballu ne’e primeiru atu hatene loloos lala’ok servisu, atu rona preokupasaun durante servisu tinan 2 APC hamriik no ikus liu mak atu reforsa estrutura APC nia servisu.
Lideransa Protesaun Sivil konsidera servisu APC todan no boot teb-tebes, maibé sente kmaan tanba ho kontribuisaun no kolobarasaun hosi diretór sira no forsa traballu APC nian bele lori APC ba oin no hadi’a di’ak liután.
“Ha’u fiar ho ita-boot sira, ita bele lori instituisaun APC ba di’ak, ita bele lori misaun sai profesionál liutan hodi servi no protege ita-nia populasaun sira,”hateten Prezidente APC.
Dirijente ne’e husu ba APC RAEOA tenke kontinua servisu ho di’ak, ho boa vontade, protidaun, laran di’ak atu atende komunidade sira bainhira hasoru dezastre.
Iha fatin hanesan, Komandante Interinu APC RAEOA atuál Komandante Bombeiros, Moises Tunis Colo informa preokupasaun ne’ebé sira hasoru menus pesoál, ekipamentu no kareta operasionál limitadu, kadeira no meza, falta formasaun ba Korpu Bomeiros, rehabilita edifísiu Bombeiros fasilidade hanesan komputador no ekipamentu elektróniku.
Durante vizita traballu Prezidente APC ho delgasaun observa edifisiu APC, armazen, fatin evakuasaun no fatin sira ne’e koloka ona sinais risku dezastre nian iha parte RAEOA.
Entretantu, iha enkontru partisipa mós Komandante APC RAEOA sesante, Inspetór Xefe Polisia, Herman Metan.