Dili, 14 Dezembru 2024-Funsionáriu permanente no ajente administrasaun hamutuk 18 hosi Ministériu Interior (MI) ho Autoridade Protesaun Sivíl (APC) simu tomada de posse ba kargu diresaun no xéfia hafoin liu hosi selesaun teste púr méritu.
Serimónia tomada de posse hala’o iha salaun hotel 5 Estrela-RAEOA, ne’ebé asiste direita hosi Prezidente Komisaun Funsaun Públika (KFP), Agostinho Letêncio de Deus, Komisáriu Portefóliu Planeamentu Forsa Traballu-KFP, José Telo Soares Cristovão, Vise Ministru Administrasaun Estatal, Sekretáriu Estadu Dezenvolvimentu Lokál, Deputadu sira hosi Parlamentu Nasionál.
Prezidente KFP, Agostinho Letêncio de Deus iha ninia intervensaun hateten tomada de pose nu’udar aktu solene, kesi ba prinsípiu legalidade hahú kedas hosi prosesu selesaun púr mérito to’o ikus liu asina termo de posse no aseitasaun.
“Aktu sira ne’e iha administrasaun públika nu’udar aktu ne’ebé legál i solene. Tomada de Posse la’os de’it lori mai ita serimónia ida, maibé tomada de posse iha aspeitu balun mak ita persija konsidera,” hateten Prezidente APC.
Lideransa KFP subliña aspeitu ne’ebé persija konsidera mak legalidade, aspeitu importante seluk mak emposadu sira deklara pulikamente ho responsabilidade ne’ebé estadu fó emposadu sira simu no juramente deklara loialidade ba Estadu no Governu, loeál de’it ba servisu.
Direjente ne’e husu ba emposadu APC atu hatudu loialidade prontu atu servi, ezije resposta ba rezultadu servisu, laiha tan razaun seluk.
Iha fatin hanesan, Sua Exelénsia Ministru Interior, Francisco da Costa Guterres hateten emposadu tomada de posse liu hosi prosesu selesaun púr mérito hodi prense vaga iha MI ho APC atu konsolida instituisaun ida ne’e hodi servi di’ak liu povu.
Governante fó agardese ba emposadu no familia sira hakarak husik sira-nia ema hodi dedika an atu servi povu no nasaun ida ne’e.
“Agradese ba família sira ne’ebé husik sira-nia ema hakarrak servi povu, tanba emposadu sira servisu operasionál, okupa kargu operasionál, servisu loron kalan la hatene, udan mós sira tenke ba, kuandu dezastre akontese sira mak sei tun iha munisípiu hotu, servisu la koñese loron no kalan,” fundamenta Membru Governu ne’e.
Ministru husu ba emposadu sira atu kontinua espíritu atu servi atu implementa no hala’o servisu ho di’ak iha terenu, tanba ita-boot sira mak besik liu ba povu.
#Cipriano# Media APC-GREC