Dili, 23 Dezembru, Autoridade Protesaun Sivíl (APC) Avalia Progressu Servisu no identifika difikuldades durante implementasaun plano no programa iha tinan 2024. Atividade ne’e loke diretamente husi Sekretáriu Estadu Protesaun Sivíl (SEPC), Domingos Mariano Reis no Akompaña husi Prezidente APC, Jesuino dos Reis Matos Carvalho. Avaliasaun refere realiza iha salaun APC Kaikoli Dili, 23 Dezembru 2024.
Iha abertura, Sekretáriu Estadu Protesaun Sivíl (SEPC), Domingos Mariano Reis, hateten objetivu husi avaliasaun ne’e atu avalia servisu durante tinan 2024 ninia progresu no identifika ninia desafiu sira.
“Agora ita atu halo avaliasaun ba servisu annual nian, hahu dia 01 de Janeiru 2024 no termina iha dia 31 Dezembro 2024, signifika durasaun avakiasaun ida ne’e ba tinan ida nian”.
SEPC ne’e hatutan tan katak avaliasaun ne’e nudar programa ikus liu ba plano no programa sira ne’ebe lao ona, nune’e mos hare ba progresu sira no identifika difikuldades ka desafiu sira durante tinan tomak nian, hahu husi primeiru semestre to’o ezekusaun ikus nian.
“Avaliasaun ne’e, hahu husi primeiru semestre ita halo saida, segundu semestre ita halo saida, terseiru trimester ita halo saida no semestre ikus nian, ba plano no programa sira ne’ebé bazea ba programa sira”.
iha okaziaun ne’e, identifika mos difikuldades ka desafiu sira ba iha implementasaun plano no programa sira APC nian, tantu husi Nasionál to’o Munisípiu sira mak hanesan menus iha rekursus umanus, espasu (edefisiu) APC nian ne’ebé la sufisiente, liliu iha Munisípiu sira inklui transporte.
Prezidente APC, Jesuino dos Reis Matos Carvalho, iha ninia intervensaun antes ensera avaliasaun ne’e, husu ba entidades hotu husi nasionál to’o munisípiu atu servisu hamutuk hodi prepara halo plano no programa ne’ebe iha ezekusaun orsamentu tinan 2025 nian.
“Ita prepara mos ba oinsa atu hare’e ezekusaun orsamentu tinan oin ninian, plano sira ne’ebé maka aprezenta, ezekuta ba programa sira ne’e ho diak no saida mak seidauk halo, kontinua implementa iha tinan 2025 nian”.
Partisipa iha Avaliasaun ne’e, Komandante Operasaun Nasionál APC, Diretór Ezekutivu APC, Diretores Gabinetes, Diretores Nasionais, Xefi Departamentu, Xefi Seksoens, Komandante APC Munisipais inklui funsionáriu sira.
Média APC