Dili, 10 Janeiru 2025-Ministériu Interior komspostu hosi Sekretáriu Estadu Protesaun Sivíl (SEPS), Polísia Timor-Leste (PNTL), Autoridade Protesaun Sivíl (APS) hala’o avaliasaun hodi aprezenta progresu servisu tinan 2024 no planu prioriedade tinan 2025 nian ho tema “Konsolida Paz no Estabilidade hodi servi Povu ho diak liu”.
Avaliasaun lidera direita hosi Sua Exelénsia Ministru Interior, Francisco da Costa Guterres akompaña hosi Sekretáriu Estadu Protesaun Sivíl, Domingos Mariano Reis iha Sentru Konvensaun Díli (CCD-Sigla Portugés), eis Merkadu Lama.
Ministro Interior, Francisco da Costa Guterres iha diskursu dezeja ksolok natal no tinan foun nian ba funsionáriu sira ho família hotu ba selebrasaun eventu ksolok ne’e no espera tinan foun ne’e bele inspira espíritu foun hodi servi povu ho diak liutan.
“Hakarak dezeja ita bo’ot sira no laran kmanek natal nian ne’ebé lori buat di’ak ruma ba ita bo’ot sira no tinan foun ita bele fó inspirasaun foun ho espiritu servi foun ba ita bo’ot sira, atu nune’e bele servi povu ida ne’e ho rai ida ne’e ho di’ak,” hato’o Ministru Interior.
Govenante IX Governu Konstitusionál apresia no agradese ba família sira tanba durante selebrasaun loron bot ne’e, funsionáriu sira labele selebra hamutuk ho família sira.
“Apresiasaun ba família sira hosi PNTL no funsionáriu sira ne’ebé selebra loron bo’ot rua ne’e la hamutuk ho ita-bo’ot sira hotu, no dala barak sira mesak iha uma no selebra mesak no fó hanoin ida katak ha’u nia laen ho fen, inan no aman,” haktuir membru Governu ne’e.
Ministru Interior apresia ba servisu no susesu iha tinan 2024 ho esperansa ba tinan 2025 sei lori inspirasaun foun no espíritu foun atu servi diak liutan komunidade sira.
“Avaliasaun profunda ida ba ita-nia servisu tinan ida no 2024 nian, iha buat barak ita halo no buat barak ita presija hadi’a no buat barak ita la konsege halo,” hateten Liderasan Ministériu Interior ne’e.
Direjente másimu MI husu ba entidades hotu atu hare no identifika didi’ak saida mak sai nu’udar problema no fatór Impedimentu ba atividade hotu ne’ebé la konsege hala’o ho di’ak iha tinan 2024 nian.
Membru Governu ne’e hatutan tan katak, ba atividade no programa sira ne’eé konsege halo ona kontinua mantein ninia kontinuidade no mellora liutan iha tinan 2025 nian.
“Se ida ne’ebé maka ita halo ona no halo di’ak ona, ita presija aumenta tan hadi’a di’ak liután, atu nune’e bele servi povu ida ne’e ho di’ak, povu senti hakmatek no povu senti kontente bainhira ita servi, para sira mós bele hala’o sira nia vida no atividade lor-loron nian ne’e maka importante liu,” esplika Ministru.
Ministru Interior dezafia entidade hotu atu identifika didiak problema no dezáfiu sira hotu atu buka solusaun hamutuk hodi kria kondisaun ne’ebé di’ak liután hodi tau hamutuk mós iha planu orsamentu tinan 2025 nian ho asaun ne’ebé konkretu.
Lideransa másimu MI esklarese tinan 2025 entidade hotu tenki preparadu hodi hasoru reforma ne’ebé sei mai atu konsolida forsa hodi firme hasoru tentativa sira, nu’udar servidór estadu nian, la’os atu haree ba ema ka pozisaun, maibé tau prioridade interese estadu nian hodi la’o tuir regras no ierárkia ne’ebé iha.
“Hau hakarak informa ba ita-bo’ot sira katak iha tinan 2025, dezáfiu lubun bot ida mak ita sei enfrenta, reforma balun ita presija halo, re-estruturasaun balun ita presija halo, halo atu dudu makina ida ne’e bele funsiona hodi hala’o servisu di’ak lután,” hateten Ministru Interior.
Atu termina governante ne’e agradese ba parte hotu ninia esforsu no kontribuisaun ba estabilidade no seguransa, liu-liu durante vizita Sua Santidade Santu Padre Francisco nian no susesu sira durante tinan 2024 nian, maske hasoru difikuldade no dezáfiu oioin.
#Media APC