Dili, 20 Janeiru 2024, APC ho CVTL realiza enkontru planu anuál jestaun risku dezastre tinan 2025. Atividade ne’e, realiza iha salaun APC Kaikoli Dili. Objetivu husi enkontru ne’e, APC ho CVTL atu hare hamutuk fali planu no programa sira ba implementasaun iha tinan 2025 nian liliu ba suku tarjetu sira. Enkontru refere, loke husi Prezidente APC, Jesuino dos Reis Matos Carvalho.
“Hanesan Prezidente APC hau orgullu tamba CVTL, hakarak koopera ho ita hensan instituisaun Governu, bainhira ita nia planu, ita nia programa ne’ebé ita trasa ona, ita hare fila fali ida ne’ebé mak ita bele koopera ho sira atu implementa iha tinan ida ne’e ba oin”, dehan Prezidente APC, Jesuino dos Reis Matos Carvalho.
Prezidente APC ne’e, realsa tan katak ema hotu desde kedas nia hanesan timoroan, sempre fo liman ba malu koopera hamutuk tamba servisu balun presija ema hotu ninia servisu hamutuk.
“Hau hakarak hateten ba kolega sira hotu, ita mesak timoroan hotu, governu fo fiar ba ita hodi halao buat ne’ebé mak durante ne’e ita planeia hela ona tamba ne’e maka mezmo APC ho ninia planu rasik, mezmu CVTL ho nia planu rasik maibe iha buat balun maka ita koopera hamutuk, iha buat balun mak ita fo liman ba malu, liliu tuir ita nia misaun, servi no proteze”. Dirijente APC ne’e haktuir.
Superior APC ne’e, esklarese katak atu proteze sidadaun sira no maluk sira ne’ebé hasoru problema liliu hanesan dezastre, laos ema ida deit maibe kooperasaun hamutuk ne’ebé mai husi entidades hotu nian. Nune’e, presija elabora planu no servisu ne’ebé diak liu.
“Hau husu ba diretores sira atu ohin ita bele koalia halo didiak liutan servisu ne’ebé CVTL hakarak selebra hamutuk ho ita ita tina oin mai, ita mos bele tau hamutuk hanoin oinsa elabora servisu ne’e, lao tuir planu no programa ne’ebé mak durante ne’e ita prepara hela ona”, hatutan Prezidente APC.
Durante enkontru Prezidente APC ne’e mos sujere liu kona-bá, diresaun sira ne’ebé iha relasaun ho dezastre hanesan DNGRD ( Diresaun Nasionál Jestaun Risku ba Dezastre), DNPM (Diresaun Nasionál Prevensaun no Mitigasaun) no DNER (Diresaun Nasionál Emerjénsia no Resposta) presija iha kooperasaun diak atu iha kampaña edukativa hare hamutuk koopera ho CVTL atu halo kampaña hamutuk ba prevensaun ninian.
Dirijente másimu APC ne’e esklarese tan katak agora eviksaun sai polémika bot iha rai laran, tamba urbanizasaun ne’ebé kauza husi ekonomia la sufiente, kampu traballu laiha hodi obriga komunidade sira mai hela hotu iha Dili.
“Eviksaun ohin loron sai polémika bot tamba problema urbanizasaun, ita hatene tamba ekonomia, tamba kampu traballu mak halo ita nia komunidade sira maihela iha fatin ne’ebé risku ba dezastre. Importante mak iha ita nia planu no programa ita halo sensibilizasaun ba sira par sira mos hatene governu hasai sira laos tamba kondena sira, lakohi sira mai hela iha sidade ida ne’e, maibe tanba sira hela la tuir regras”. Dehan Jesuino dos Reis Matos Carvalho Prezidente APC ne’e hatutan katak liu husi kampaña edukativa, sensibilizasaun no servisu hamutuk hodi proteze sidadaun sira no halo sira kompriende liutan kona-bá dezastre ne’e
Ita ba halo kampaña iha fatin sira ne’ebé risku tenki halo rekomendasaun ba governu par halo eviksaun atu nune’e, labele tinan hasai osan barak liu ba iha apoiu emerjénsia no rekoperasaun, liliu buka atu hases sidadaun sira husi risku ba dezastre.Hau husu ba diretores sira, inisiativa ne’ebé mak diak husi CVTL, mai ita koolabora kaer hanoin ida iha planu ruma ita bele koopera iha baze, servisu hamutuk hodi suporta malu.
Partrisipa iha ekontru ne’e, diretór GREC, diretór DNGRD, Diretór Sentru Formasaun, Diretór Prevensaun no Mitigasaun, diretór Emerjénsia no Responde, reprezentante husi CVTL Timor-Leste, xefi departamentu, xefi seksaun inklui funsionáriu APC nian. Enkontru ne’e, realiza tamba kooperasaun diak entre APC ho CVTL.
#Média APC.