Dili, 23 Janeiru 2025-Parseiru Mercy Corps apoiu pakote emerjénsia la’os aihan ka non food item hamutuk 195 ba Autoridade Protesaun Sivíl (APC) hodi responde ba vítima dezastre iha munisípiu Ainaro ho Covalima.
Sekretáriu Estadu Protesaun Sivíl, Domingos Mariano Reis iha sermónia entrega hatete pakote emerjénsia importante atu responde no fó asisténsia umanitária ba komunidade sira, bainhira afeita dezastre.
“Preparasaun no resposta emerjénsia ba dezastre persija mós pakote emerjénsia, ho nune’e parseiru Mercy Corps oferese pakote emerjénsia 195 apoiu ba APC importante atu bele ajuda komunidade sira bainhira hasoru dezastre,” hateten SEPC.
Governante agradese no apresia ba Mercy Corps hatudu ninia apoiu asisténsia umnitária importante bainhira dezastre akontese iha terenu bele responde kedas iha situasaun emerjénsia.
Lideransa Protesaun Sivíl ne’e, husu ba Diresaun Nasionál Emerjénsia no Resposta, Komandu APC munisípiu Ainaro no Covalima atu simu sasan hirak ne’e tenke ho utiliza ho kuidadu no másimu, halo jestaun ne’ebé diák iha aramezen.
Ikus liu, Membru Governu agradese no rekoñese Mercy Corps nu’udar parseiru halo ona movimentu ho APC hatudu vontade ne’ebé di’ak.
“Apoiu ida ne’e hodi hatudu maské ki’ik la’os valór, maibé hatudu asaun katak Mercy Corps iha vontade atu apoiu APC di’ak liu iha futuru,” esplika SEPC.
Iha fatin hanesan, Country Director Mercy Corps, Sean Kenney introdús Mercy Corps ninia serbisu suporta iha rejiaun liu-liu ba asuntu redusaun risku dezastre hanesan asuntu ida ne’ebé suporta iha rejiaun hamutuk ho Mercy Corps senti onrandu iha Timor-Leste, atu responde no ajuda komunidade iha tempu sira presiza nomós haree ba sira-nia nesesidade iha prosesu rekoperasaun nia laran.
“Polítika ho sistema sira atu suporta serbisu koperasaun importante tebes maibé iha prosesu ida ne’e atu responde, no responde ida ne’e ita hein ba iha rekoperasaun,” dehan Country Mercy Corps.
Country Mercy Corps mós agradese tebes ba estrutura tomak ne’ebé fasilita sira iha prosesu ne’ebé mak inklui parseiru sira hodi halo prosesu ne’e sai di’ak.
Entretantu, pakote emerjénsia la’os aihan kompostu hosi item 21 hanesan terpal, sampo, sabaun, lilin, bikan plástiku, pastadente, toalha, eskova no seluk-seluk tan.
Akompaña iha serimónia entrega pakote ermerjénsia ne’e kompostu hosi Komandante Nasionál Operasaun Protesaun Sivíl, Sup. Asistente Polísia, Nuno Romulado Gomes, Diretór Ezekutivu APC, Gui Savio Vicente Caeiro, inklui Diretór Diresaun Nasionál Jestaun Risku ba Dezastre, Fransisco Fátima da Cruz, Diretór Nasionál Jestaun Rekursu, Virgilio do Santos Soares, Inspetora GIAI, Odete Calado, Komandante Operasaun APC, Munisípiu Ainaro no munisipiu Covalima, Xefi Unidade Marítima, Cosme Belo, Xefi Unidade Terestre, Martinho de Fátima, Xefi Unidade Aero Antonio Viegas, Xefi Departamentu no Xefi Seksaun sira APC.
#Media APC.