Lautém, 09 Fevereiru 2025 – Autoridade Protesaun Sivíl (sigla português-APC) Munisípiu Lautém liu husi ekipa servisu Gabinete Jestaun Risku Dezastre no Gabinete Rekuperasaun ne’ebé akompaña husi autoridade lokál Suku Caenlio iha loron domingu ne’e (data 09-02-2025), hala’o asesmentu no mós entrega pakote emerjénsia hanesan ai-han no la’os ai-han ba Octávio Anunciação, ne’ebé nia uma hetan estragus tamba kauza husi anin-bo’ot, ne’ebé rezulta uma-hela vítima afetadu hetan estragus husi parte uma-kakuluk leten.
Akontesimentu dezastre naturais ne’e akontese iha loron; 09 Fevereiru 2025, madrugada oras 03:15 OTL, ba vítima afetadu husi aldeia Maluhira, suku Caenlio, Postu Administrativu Iliomar, Munisípiu Lautém.
Relasiona ho situasaun ne’e, Xefe aldeia Maluhira Alfredo da Costa haktuir ba ekipa servisu APC Munisípiu Lautém katak vítima afetadu ho família provizóriamente hela iha vizinu sira nia.
Média APC Lautém hakarak relata sobre situasaun klima jerálmente iha Munisípiu Lautém katak, dadaun ne’e iha parte Leste udan ne’ebé akompana anin ho intensidade fraku-forte kontinua akontese.
Ildefonso Soares Média APC Lautém.