Lautém, 10 Fevereiru 2025 – Relasiona ho situasaun jerál koná-bá anin-bo’ot ho velosidade fraku moderadu ne’ebé kontinua akontese iha parte Leste, nune’e iha loron rua nia laran loron domingu, 09 fulan Fevereiru tinan 2025 no loron segunda-feira, 10 fulan Fevereiru tinan 2025 rezulta tan uma-hela Xefe família haat (4) husi Postu Administrativu Iliomar hetan estragus.
Entretantu vítima afetadu uma-kain rua (2) husi aldeia Larimi, suku Caenlio mak hanesan; Aleixo da Costa no Júlio da Costa, vítima Julieta Pinto husi aldeia Acara, Suku Iliomar-2 no vítima Marcos de Jesus husi Aldeia Tirilolo, Suku Tirilolo, Postu Administrativu Iliomar Munisípiu Lautém.
Ho situasaun dezastre naturais ne’ebé komunidade uma-kain haat (4) ne’e enfrenta, nune’e Autoridade Protesaun Sivíl (sigla português-APC) Munisípiu Lautém, hala’o intervensaun liu husi servisu Gabinete Munisipál Rekuperasaun no Gabinete Munisipál Jestaun Risku Dezastre, ne’ebé lidera husi Xefe Gabinete
Munisipál Rekuperasaun interinu Eusébio José Lopes, ne’ebé akompaña husi autoridade lokál sira hala’o hela asesmentu no mós fornese pakote emerjénsia hanesan ai-han no la’os ai-han ba vítima dezastre uma-kain haat (4) ne’e.
Liu husi observasaun direta husi ekipa APC Munisípiu Lautém katak, entre uma-kain hirak ne’e iha uma-kain tolu (3) mak ekipa APC bele verífika no uma-kain ida (1) mak hetan de’it apoiu emerjénsia husi APC Munisípiu Lautém.
Hakarak informa katak, akontesimentu dezastre naturais anin-bo’ot ne’e la rezulta ema ruma kanek ou lakon vida maibé estraga de’it uma-hela vítima sira hetan estragus iha parte uma kakuluk leten no didin lolon.
Ildefonso Soares, Média APC Lautém.