Lautém, 26 Fevereiru 2025, Autoridade Protesaun Sivil (APC), liu husi Diretór Gabinete ba Relasaun Externa no Komunikasaun (GREC-APC), Cesario da Silva Marques akompana husi Komandante APC José Agostinho Pacheco no Komandante Korpu Bombeiros Munisípiu Lautém Martinho de Carvalho, halo sensibilizasaun enkuardamentu legál hanesan lei protesaun sivíl no dekretu lei sira ba komunidade no lideransa komunitária Suku Leuro, Postu Administrativu Lospalos, Munisípiu Lautem.
Atividade refere realiza iha Sede Suku Leuro hahú husi loron 25 to’o 26 Fevereiru 2025.
Objetivu husi sensibilizasaun atu fahe informasaun kona-bá Lei Baze Protesaun Sivíl Nu. 12/2020 de 12 de Dezembru no dekretu lei . Ho ninia ninia papél importante ne’ebé deskreve iha lejislasaun mak hanesan Proteze Ema, Riku Soin, no Ambiente, liu husi dalan Prevensaun no Resposta.
Aprezentasaun ne’e, aborda mos Dekretu Gov. Nu.11/2022 ne’ebé revoga ona ba Dekretu Lei Nu. 23/2024, 10 de Maiu, kona-bá Estrutura Orgánika APC, funsaun no responsabilidade APC ba enkuadramentus legais ida ne’ebe diak hodi atua ba iha situasaun, no mos atu explora prosedimentus resposta emerjénsia no mekanismu hodi bele apoiu vítima dezastre.
Sensibilizasaun ne’e ninia tarjetu ba suku, liliu autoridade lokal suku sira ho ninia objetivu atu oinsa autoridade lokal sira desimina tutan ba komunidade sira atu komunidade sira kompriende didiak papél Autoridade Protesaun Sivíl nian iha períodu antes dezastre, durante dezastre no depois dezastre.
Iha abertura, Xefi Suku Leuro, Carlito Viegas husu ba partisipante sira atu ativu no intende didiak informasaun ne’ebé APC fahe atu bele desimina fali ba komunidade Sira.
“Husu para intende didiak ba esplikasaun husi nasional, atu bele sosializa fali ba komunidade sira atu kompriende didiak”, dehan Carlito Viegas.
Lideransa Suku Leuro ne’e salienta liutan katak sensibilizasaun ne’e importante tamba ho objetivu atu partilla ou sosializasaun ba lei Protesaun Sivíl nian. Husu ba membru konsellu suku atu partisipa masimu tamba assuntu ida ne’e importante ba ita nia suku.
Iha intervensaun Diretór Gabinete ba Relasaun Externa no Komunikasaun (GREC-APC), Cesario da Silva Marques hateten presenja APC nian atu fahe informasaun ba komunidade atu bele kompriende didiak servisu Protesaun Sivíl nian wainhira halo atendimentu ba komunidade sira wainhira hasoru dezastre.
“Ami hakarak mai par partilla Lei Baze Protesaun Sivíl ba iha suku sira hodi fahe informasaun konaba ba dezastre, oinsa komunidade sira ne’ebé hetan dezastre ne’e nia direitu mak ida ne’e”, tenik Diretór GREC Cesario da Silva Marques.
Fasilitador Lei baze Protesaun Sivíl APC ne’e informa liutan katak liu husi aprezentasaun lei ne’e bele hamosu diversus sira kona-bá preokupasaun komunidade nian ne’ebé durante ne’e komunidade sira hasoru winhira hetan dezastre.
Diretór GREC-APC hatutan tan katak liu husi disiminasaun Lei Baze Protesaun Sivíl ne’e mós fo biban ba autoridade lokál sira atu observa ka hare oinsa atendimentu ba komunidade sira lao tuir matadalan lolos ne’ebé regula iha enkuadramentu legais Protesaun Sivíl nian.
Parisipantes ba iha sensibilizasaun refere hamutuk ema nain 20 ne’ebé kompostu husi Xefi Suku Leuro, Konsellu Suku, Xefi Aldeia Soro-Moco, Leuro, Luturula no Aldeia Tcharano inklui delegadu no delegada sira.
Tuir Kalendáriu, iha loron 27-28 Fevereiru 2025 ekipa APC kontinua sensibiliza Lei Baze Protesaun Sivíl ne’e iha Suku Cacavei, Postu Administrativu Lospalos Munisípiu Lautém.
Média APC.