Aileu , 26 Fevereiru 2025-Autoridade Protesaun Sivíl liu husi Gabinete Relasaun Externa no Komunikasaun (APC-GREK) Nelson Nunes de Orleans hala’o sensibiliza enkuadramentu legais hanesan Lei Protesaun Sivíl nu.12/2020 12 de Dezembru inklui dekrétu lei no orgánika APC ba komunidade no lideránsa komunitária suku Liurai, Postu Administrativu Aileu Vila, Munisípiu Aileu .
Liu hosi sensbilizasaun ho objetivu atu partilla informasaun kona-ba enkuardamentu legais, inklui papél no kna’ar importante APC nian, ne’ebé mak deskreve iha lejislasaun mak atu salva ema, ambiente no riku soin bainhira hetan dezastre naturais.
Xefe Relasaun Externa no Komunikasaun Nelson Nunes de Orleans hateten katak dezastre naturais akontese la husu ema ida, maibé dezastre ne’e mai derepente de’it oinsa mak bele hatene no oinsa mak halo prevensaun husi dezastre naturais.
Iha sensibilizasaun fasilitadór, Xefe Relasaun Externa no Komunikasaun Nelson Nunes de Orleans Nunes esplika lei fó dalan ba ezisténsia Protesaun Sivil hodi kompleta terseiru pilár hosi sistema seguransa nasional iha Timor-Leste, primeiru mak F-FDTL, segundu PNTL, no terseiru Protesaun Sivil.
Nia fundamenta APC ninia kna’ar importante haree ba asuntu dezastre naturais iha territoriu Timor-Leste, ne’ebe foku mós prevensaun no mitigasaun, responde emerjénsia, dezastre ba uma, ambiente ho vida.
“Sensibilizasau parte hosi planu atividade APC tinan tinan ida ne’e ita hahu halo ona ba iha nivel suku, iha tinan kotuk hala’o iha nivel postu, tanba ne’e iha munisipiu Aileu ita komesa iha suku ha’at suku Liurai, Aisirimou, Seloi Malere no Talitou ita hatene katak suku sira ne’e sempre afeita ba dezastre naturais,” esplika Xefe Seksaun, Nelson Nunes de Orleans.
Enkuantu, Xefe Suku Liurai, Bendito Gomes hateten Prejensa APC iha Suku Liurai importante mós atu fó informasaun kona-bá dezastre naturais, atu nune’e komunidade labele hetan dezastre naturais wainhira iha tempu udan no bailoron, hanesan hela iha mota ninin no hela iha fatin ne’ebé fó risku ba vida.
Partisipa iha programa sensibilizasaun partisipante hamutuk nain 20 resin kompostu husi xefe suku ho membru konsellu suku Liurai, inklui komunidade sira iha suku refere.
Frederico Lopes Média APC.