Ermera, 07 Marsu 2025-Ministro do Interior, Francisco da Costa Guterres, Ph.D, akompaña husi Sua Exelénsia Secretário Estado Proteção Civíl (SEPC) Domingos Mariano Reis ho Prezidente Autoridade Proteção Civil (APC); Jesusino dos Reis de Matos Carvalho hala’o vizita ofisiál iha Munisipiu Ermera, hodi halo enkontru ho funsionáriu no estrutura tutula iha baze hanesan PNTL, APC, DNB, DNPKK no DNSPP.
Objetivu husi vizita Ministro do Interior Francisco da Costa Guterres, Ph.D, hodi hare’e, rona, no halo observasaun dereita ba progresu servisu no dezafiu sira ne’ebé enfrenta husi baze nune’e bele hadi’ak servisu no atendementu iha públiku.
“Husu ba PNTL, APC, DNB, DNPKK, no DNSPP, servisu ho disiplina tamba povu sira presiza hela imi kuandu iha dezastre, wainhira povu iha susar no terus imi maka to’o uluk, tanba imi-nia prezensa hasai sira husi laran tauk no laran susar no, sira bele sente iha ema bele ajuda sira iha situasaun difisil no nia laran, imi mós iha servisu importante ida, atu ba fó hatene ba povu sira labele hela besik iha mota ninin sira atu nune’e iha tempu udan, sira la afeita ba dezastre no hadok-an husi risku dezastre nian, imi maka tau matan ba povu sira ne’e”, dehan Ministro do Interior Francisco da Costa Guterres, Ph,D.
Entretantu, Prezidente APC, Jesuíno do Reis Matos Carvalho, sente kontente ho vizita Ministru Interior ho ekipa mai hodi rona rasik preokupasoens ne’ebé funsionariu sira hasoru.
“Ita hotu, agradese tanba ohin Ministru Interior bele mai to’o iha ne’e atu hare rasik progresu servisu no-mos ita nia preokupasaun. Ita rekuñese ekipamentu, rekursu humanu no infraestrutura sei falta maibe dever imi nian kontinua servisu hamutuk hodi atinji progresu”, esplika Prezidente Autoridade Proteção Civil (APC); Jesusino dos Reis de Matos Carvalho.
Lideransa APC ne’e hatutan Ministru Interior halo servisu extra ordinaria tebes hodi kontinua halo instituisaun sai boot ba bei beik, hodi halo prevensaun, mitigasaun no resposta ba situasaun emerjénsia no katástrofe oi-oin.
Enkontru ne’ebé hala’o iha Salaun Autoridade Munisipiu Ermera ne’e hetan akompañamentu hosi Prezidente Autoridade Protesaun Sivil Jesuino dos Reis Matos Carvalho, no-mos Diretór Jerál Seguransa Prevensaun Konflitu Gaspar de Sousa, inklui Diretores Nasioais, Xefe departamentu sira hosi Nasionalno estrutura tomak iha baze.
Sebastião dos Santos Média APC Ermera.