Ermera, 19 Marsu 2025- Komandante APC Munisipiu Ermera Norberto Soares Exposto akompaña husi Xefe Departamentu Diresaun Nasional Jestaun Risku Dezastre Munisipiu Ermera Sabino Amaral Fernandes ho ekipa hala’o atividade kuda ai oan iha Aldeia Sacoco, Suku Ponilala, Postu Administrativu Ermera.
Objetivu husi kuda ai oan ne’e hodi hala’o prevensaun no mitigasaun ba dezastre rai ne’ebé monu liu husi programa reflorestasaun ai ne’ebé hetan inséndiu.
Komandante APC Munisipiu Ermera Norberto Soares Exposto hateten ba komunidade Ermera, Suku Ponilala atu labele halo deit karta pedidu tesi ai de’it maibé presiza mós halo pedidu husu ai oan sira ba parte relevante sira hodi kuda iha area ne’ebé akontese erosaun sira
“Labele halo pedidu tesi ai de’it maibé koko halo pedidu hodi husu ai oan atu kuda hodi nune’e bele proteze no reduz impaktu husi dezastre naturais sira hanesan erosaun, rai monu no inséndiu floresta sira”, dehan Komandante APC Munisipiu Ermera Norberto Soares Exposto.
Iha sorin seluk Xefe Suku Ponilala Alberto Martins apela ba komunidade Suku Ponilala atu labele tesi ai no sunu rai arbiru, atu nune’e ai-horis sira fó moris ba ema nia vida, liu-liu preserva be’e matan sira.
“ Husu ba komunidade Suku Ponilala atu labele tesi ai arbiru, sunu rai arbiru hodi nune’e ai oan ne ita kuda ona labele estraga maibé bele fó oksijenu ne’ebé fresku no mo’os liu-liu ba ema nia vida no bainhira ita kuidadu no tau matan ba ita nia ambiente nune’e ita sei preserva ita nia be’e matan sira to’o tinan naruk nia laran hodi fó moris ba ita nia beleza natural ne’ebé iha”, dehan Xefe Suku Ponilala Alberto Martins.
Partisipa iha atividade kuda ai oan ne’e husi Aministrador Postu Administrativu Ermera, Komandante Polisia Eskuadra Ermera,OPS Suku Ponilala, Diretór servisu dezastre Munisipál,Xefe Suku Ponilala,Xefe Aldeia Sacoco, Koordenador EBF Sacoco, Estudantes EBF Sacoco no Komunidade Aldeia Sacoco.
Sebastião dos Santos Média APC Ermera.