Manatuto, 21 Marsu 2025- Prezidente Autoridade Protesaun Sivíl Jesuinho dos Reis de Matos Carvalho hamutuk ho estrutura APC Manatuto hala’o observasaun dereita ba fatin akontesementu be’e moris iha uma komunidade hamutuk 14 mak hetan afetada iha Aldeia Iun, Suku Iliheu, Postu Administrativu Manatuto Vila, Munisípiu Manatuto.
Kauza husi be’e moris ne’ebé mosu halo komunidade sira sente ladun seguru tamba bele mosu inundasaun nomós erosaun bainhira udan kontinua tun
Prezidente Autoridade Protesaun Sivil Jesuinho dos Reis de Matos Carvalho hateten fonomena ida ne’e úniku, tamba bain-bain akontese Be’e SAE, Rai halai, Rai Monu, no Ahi Han.
“ Fenomena ida ne’e, hanesan buat ne’ebé úniku nomós nunka akontese maibé só akontese de’it iha tempu be’e sa’e, rai halai ka erosaun no rai monu”, dehan Prezidente Autoridade Protesaun Sivil Jesuinho dos Reis de Matos Carvalho.
Lideránsa APC ne’e husu nafatin ba komunidade Iliheu atu nafatin kopera diák ho parte governu liu husi ekipa APC Munisípiu Manatuto bainhira mosu dezastre tamba APC prontu iha 24 horas hodi atende komunidade sira nomós karik akontese situasaun ne’ebé mais ameasadu ekipa APC pronto atu halo evakuasaun ba komunidade sira.
Iha biban ida ne’e ekipa APC Manatuto hala’on kedas distribuisaun pakote emerjénsia hanesan Food ho non food item (aihan no laos aihan) ba família afetada hamutuk uma-kain 14
Eugenia Soares Média APC Manatuto.