Lautém, 07 Abríl 2025 – Akontesimentu dezastre inséndiu ne’e afeta ba komunidade uma-kain rua (2) ne’ebé akontese iha data; 04 Abríl 2025, oras tuku 12:30 OTL. Vítima afetada xefe família rua (2) ne’e mak hanesan Amário Miranda husi Aldeia Caentau, Suku Iliomar-1, no José M. Hornay, husi Aldeia Iliomar, Suku Iliomar-1, Postu Administrativu Iliomar, Munisípiu Lautém.
Impaktu husi inséndiu ne’e, rezulta uma rua (2) ne’e motuk hotu inklui sasán uma-laran la-konsege salva. Relasiona ho insidente ne’e, Autoridade Protesaun Sivíl (APC) Munisípiu Lautém, liu husi Xefe Departamentu Jestaun Risku Dezastre Olficâncio Palau Flores no Xefe Departamentu Rekuperasaun Florindo da Costa Neves hamutuk ho ekipa imiadatamente apoia pakote emerjénsia hanesan ai-han no la’os ai-han ba vítima dezastre uma-kain rua (2) refere.
Tuir informasaun ne’ebé asesu husi ekipa APC iha terenu katak inséndiu ne’e akontese tamba kauza husi ema deskunesidu ne’ebé sunu duut hodi alarga ba uma vítima.
Enkuantu tuir observasaun husi ekipa APC Munisípiu Lautém, iha uma ida mak ekipa APC bele verífika no iha uma ida (1) mak ekipa APC labele verifika tanba kategoria uma-dapur.
Ildefonso Soares, Média APC Lautém.