LORON IKUS TREINAMENTU UEPC, BOMBEIROS, CVTL PRÁTIKA SIMULASAUN SALVAMENTU

Likisa, 06 abríl 2025

Hafoin membru Unidade Espesiál Protesaun Sivíl (UEPC), Bombeiros ho CVTL tuir eleva kapasidade treinamentu salvamentu marítima hanesan tasi, lagoa, mota durante loron 5, ho nunee loron ikus formasaun kontinua kedas prátika simulasaun buska no salvamentu iha tasi área Kaitehu, munisípiu Likisa.

Atividade prátika simulasaun buska no salvamentu nu’udar preparasaun antes atu responde situasaun emerjénsia no akontese dezastre sira área marítima nian.

Komandante UEPC, Fernando da Costa, hateten, formasaun ne’e hanesan asaun preparasaun antes dezastre, hodi fó resposta emerjénsia hidrográfika hanesan salva no buka tuir ema sira sai vítima ba dezastre iha área tasi ka bee-lihun sira.

“Ezersisiu ida ne’e nia objetivu maka atu prepara membru sira nia kapasidade kona-ba protesaun vida humana liu-liu responde ba situasaun emerjensia, karik mosu dezastre ruma membru UEPC no CVTL iha ona kuñesimentu atu salva no busca iha areia maritima ninian”, esplika Fernando iha Aldeia Mota Ikun, Suku Mota Ulun, Postu-Administrativu Bazartete, Munisipiu Liquiça.

Tuir nia, ezersisiu ne’e haree liu ba oinsá atu hanorin luku no halo kontrolu ba inséndiu hanesan ahi han ró no bee tama iha ró laran oinsá bele rezolve, ne’ebé ita bolu limitasaun no avaria.

“Iha ne’e hau hakarak atu foku ba area prioridade balu ne’ebe maka sai mos hau nia responsabilidade mak hanesan, prosesu dezenvolvimentu rekursu humanu, fo treinamentu kontinuasaun ba membru sira atu dezenvolve area operasional hodi sai membru ne’ebe profisional no modernu. Enkuantu husi ezersisiu ne’e sira bele iha esperiensia nune’e bele sai profisional liutan hodi halo sira nia knar”,

Nia dehan, oras ne’e, preparasaun rekursu humanu importante tebes hodi koresponde ba situasaun emerjensia iha futuru nune’e nia parte sei kontinua hasa’e koñesimentu no kapasidade rekursu humanu hodi sai profesionál.

“Liu hosi treinamentu ida ne’e ba futuru ita koko atu kontinua halo simulasaun iha primeiru nivel situasaun alerta ba resposta emerjénsia sei uza rekursu adekuadu halo simulasaun ró hetan dezastre iha tasi, oinsa buka hodi salva vítima sira. Hafoin kontinua halo simulasaun ba nivel resposta ka nível kontijénsia, ne’ebé enevolve liñas Ministeriais sira hanesan apoiu emerjensia hosi ambulansia, CVTL no UPM ne’ebé define iha ida-idak nia tarefa.

Komandante Fernando afirma, ba futuru wainhira mosu dezatre ruma ekipa Unidade Espesial Protesaun Sivil sei halo koordenasaun diak hodi fó protesaun, prevensaun no responde diak ba familia vitima sira.