Díli, 25 janeiru 2023- Autoridade Protesaun Civil liuhusi Diresaun Nasionál Prevensaun Konflitu Komunitáriu (APC-DNPKK) halo avaliasaun hodi aprezenta dezáfiu no progresu servisu tinan tomak 2022 hahú hosi nivel nasionál to’o munisípiu inklui servisu mediadór sira-nian.
Iha abertura Komandante Operasaun, Nuno Romualdo Gomes hateten apresia tebes ho esforsu no progresu servisu DNPKK nian hosi munisípiu to’o nasionál nian ne’ebé hatudu no lori progresu boot iha tinan 2022.
Komandante konsidera ho avaliasaun servisu mak atu bele hatene progresu no buka solusaun ba dezáfiu nomós difikuldade iha tinan kotuk nian liuliu iha implementasaun atividade operasinonál nível komunidade.
Segundu lideransa APC hatutan avaliasaun sai fatór importante ida atu hatene atinjementu no meta servisu DNPKK nian iha APC.
Entretantu, progresu ne’ebé DNPKK atinje ona iha tinan 2022 mak impelementa ona atividade liga ho formasaun edukasaun sivika ba estudante, komunidade no lideransa komunitária, asaun promove dame liuhusi diálogu, palku dame ba juventude arte marsias no arte rituál hodi kontribui ba pás no estabilidade, desiminasaun Planu Asaun Nasionál 1325 kona-ba Feto, Pás no Seguransa ba komunidade no lideransa komunitária, fasilita mediasaun hodi kria relasaun di’ak ema nian iha nível aldeia to’o suku sira.