Díli, 8 fevereiru 2023, (GREC) – Organizasaun La Govermentál (ONG) FOKUPERS realiza formasaun kona-bá orsamentu sensível ba funsionáriu Autoridade Proteção Civil (APC) hosi diresaun nasionál ne´ebe tutela ba APC, Kuarta (8/2/2023) iha salaun enkontru FOKUPERS, Farol, Dili.
Objetivu husi formasaun ne’e atu kapasita funsionáriu sira APC nia hodi ezekuta orsamentu ne’ebé iha ho di’ak no sai matadalan no influénsia liuhusi orsamentu ba sensibilizasaun ne’ebé aloka orsamentu hanesan ba ema hotu-hotu liuhusi nesesidade komum.
Maria Brantes nu´udar Ofisiál Treinadór ba iha formasaun ne’e haktuir; formasaun ne’e ita hanoin atu kapasita funsionáriu APC sira ne’ebé hetan kna’ar ba kargu xefia sira nomós Pontu Fokál sira atu komprende di’ak liutan ba alokasaun orsamentu iha jéneru nian oinsa atu ezekuta orsamentu ne’e la’o ho di’ak.
Entertantu Country Coordinator CARE International, Maqsood Kabir esplika katak, sira iha vontande no komitmentu atu sai parseiru hodi servisu hamutuk ho instituisaun estadu nian ne’ebé iha relasaun servisu ho dezastre, Catástrofe no asegura sidadaun nia vida iha situasaun emerjénsia nian.
“Hau senti kontenti tebes hare’e katak ohin loron, ema ne’ebé iha nível foti desizaun sira mak marka sira nia partisipasaun iha treinamentu orsamentu sensível ba jéneru ida ne’e, ho ida ne’e hatudu katak, Ita nia Governu liuliu APC tane a’as ona kona-ba inkluzaun sosiál iha redusaun risku dezastre no preparasaun ba responde dezastre inkluzivu,” dehan Kabir.
Formasaun ne´ebé FOKUPERS halo ne´e hetan tulun finansiamentu husi CARE Internationál.