Díli, 13 Fevereiru 2023 – Governu Nóva Zelandia liu hosi nia embaixada iha Timor-Leste prontu atu kapasita funsionáriu Autoridade Protesaun Sivíl (APC) iha area rekursu humanus.
Adjuntu Xefi Misaun nu´udar mós Primeiru Sekrétariu Dezemvolvimentu iha Embaixada Nóva Zelandia, Nick Borthwick hateten Governu sira nian liu hosi koperasaun bilaterál prontu atu kapasita Timoroan sira iha rekursu umanu nian inklui ba APC.
Entertantu Laos tó iha ne´e deit maibe kada tinan Governu Nóva Zelandia sempre fó bolsu estudu ba Timoroan sira, inklui mós bele loke oportunidade ba funsionáriu APC sira.
Prezidenti APC, Superintendente Polísia, Ismael da Costa Babo, M.Sc, lori APC nia naran mós agradese ba programa Governu Nóva Zelandia nian ne´ebé tulun ona funsionáriu APC hodi hetan ona formasaun iha kursu Inglesh no apoiu sira seluk relasiona ho asuntu dezastre naturais nian.
Hola prezensa iha inkontru ne´e mos Sekrétaria Daruak Embaixador Nóva Zelandia, Sra. Eva Laurenson, Diretór Gabinete Relasaun Externa no Komunikasaun (GREC), Sr. Anacleto Caetano, Assesor GREC Sr. Sofyar Yoga no Asesor Media APC, Sr. Evangelisto Gantry dos Santos Meilana.