DILI, Autoridade Protesaun Cívil liuhusi Diresaun Nasionál Prevensaun Konflitu Komunitáriu (APC-DNPKK) ho UN WOMEN fasilita formasaun ba lideransa komunitária hodi eleva koñesimentu kona-ba papel no responsabilidade iha prosesu mediasaun, ne’ebé sensivel ba jéneru no inkluzivu iha baze komunidade.
Formasaun hala’o iha Hotel City8 durante loron rua, hahú hosi 30 to’o 31 marsu 2023, ne’ebé foku liubá xefe suku no membru konsellu suku sira hamutuk 42 iha munisípiu Dili.
Diretór DNPKK, António Viegas hateten formasaun importante atu reforsa xefe suku kona-ba mediasaun hodi fó atendimentu komunidade sira.
“Objetivu formasaun ba loron rua, atu reforsa Na’i suku sira-nia koñesimentu atu oinsa bele buka solusaun no atendimentu ba komunidade sira-nia problema liuhusi dalan mediasaun,” esplika Diretór.
Superiór DNPKK konsidera feto nuudar mediadora sira-nia partisipasaun importante tebes iha prosesu lidera mediasaun fasil atu hetan soluasaun ho lais, tanba DNPKK iha mediadora barak mak nunee.
Nia informa “Atu reforsa suku no aldeia, mediadora DNPKK sei servisu hamutuk, hodi fó asesu justisa ne’ebé justu ba ema kbiit laek sira, labele kria diskriminisaun, respeita sira, la haree ba nivel kiik ka boot, riku no ki’ak , atendementu tenke imparsiál, atu nunee komunidade sira sente kontetnte no seguru ho ita-nia prejensa ba sira.”
Lideransa diresaun esklarese daudaun DNPKK la’o hamutuk ho PNTL, no lideransa komunitária hodi enkontru tama sai suku atu halo prevensaun antesipa kamapaña no eleisaun parlamentár.
Enkuantu, Reprezentante UN WOMEN, Jerimias Baptista Gomes hateten mediasaun dalan atu rezolve problema ka konflitu naruk, la’os problema hotu, maibé problema balun bele halo mediasaun no problema balun labele halo mediasaun.
Nia haktuir “Ita ema moris sei labele ses husi problema, problema sempre iha, tanba ne tenke buka planu hodi rezolve problema saida maka ita hasoru. Tanba problema ninia impaktu boot tebes mai ita-nia moris, liuliu feto ho labarik maka barak liu sai vitima ba problema ne’ebé ita hasoru.”
Konsultór UN WOMEN konsidera formasaun atu fó hanoin malu hodi foti asaun ruma bele prevene konflitu banihira mosu hodi hamenus no buka solusaun ida ne’ebé sensivel ba jéneru liuliu tau matan ba nesesidade feto ho labarik.
Reprezenta ne’e deklara parte UN WOMEN nafatin fó apoiu no suporta APC-DNPKK hodi kapasita mediadora, lideransa komunitária no OPS sira iha area mediasaun hodi resolve problema no konflitu iha komunidade.
Reportazem: Cipriano Mesquita