Kovalima, 12 abril 2023-Autoridade Protesaun Sivíl liuhusi Diresaun Nasionál Prevensaun Konflitu Komunitáriu (APC-DNPKK) implementa programa Palku Dame iha munisípiu Kovalima hodi prevene konflitu no violénsia liuliu iha períodu kampaña no eleisaun parlamentár 2023.
Diretór DNPKK Antonio Viegas hateten objetivu implementa Palku Dame atu prevene konflitu hodi labele mosu iha kampaña no eleisaun parlamentár.
Tanba ne’e, Nia husu grupu arte marsias no juventude sira iha Kovalima atu hakribi violénsia hodi kria dame atu fó biban ba partidu politik sira hatoo sira-nia programa iha tempu kampaña.
“Husu ita hotu atu kontribui kria pás no estabilidade durante tempu kampaña ne’ebé sei hahú iha dia 19 abril no eleisaun dia 21 fulan maiu tinan ida ne’e,” dehan Diretór.
Iha fatin hanesan, Reprezentante Administradór Munisípiu Kovalima, Francisco Mendonça da Costa hateten liuhusi Palku Dame parte halo transaformasaun ba mentalidade joven sira-nia hosi asaun violentu ba naun violentu.
Nia esplika ba grupu arte marsiais sira treinu hanesan arte ida atu defende an, kuandu iha asaun hosi ema ruma, arte marsiais parte hosi desportu, ezersisiu fiziku ida.
Iha biban ne’e, Komandante PNTL Munisípiu Kovalima, Suprientendente Asistente, Basílio de Jesus konsidera joven mak autór prinsipál atu hadi’a dezenvolvimentu no esperansa ba estadu.
“Joven labele sai autór atu estraga rai ida ne’e, maibé joven tenke sai autór hodi hadi’a rai ida ne’e, joven sai esperansa ba família, esperansa ba komunidade, esperansa ba estadu no nasaun,” haktuir Komandante Basílio.
Autoridade Seguransa ne’e husu ba juventude Kovalima oan atu prepara-an sai joven ne’ebé vale estadu RDTL, tanba juventude mak kontinuadór ba futuru dezenvolvimentu nasaun nian.
Alende, implementa Palku Dame iha munisipiu Kovalima hala’o mós iha munisipiu Ermera, Bobonaro, Manufahi, Likisa, RAEOA, Ataúro, Baukau, Laútem no Manatuto.
Entretantu, atividade Palku Dame envolve Grupu Arte Marsiais PSHT, IKS PTL, Kungfu Wushu, estudante, inklui lideransa komunitária no autoridade importante sira hosi PNTL, KRAM, CNE, Padre Parokia Igreja Zumalai.
Reportajena Cipriano Mesquita