𝐊𝐎𝐑𝐏𝐔 𝐁𝐎𝐌𝐁𝐄𝐈𝐑𝐎𝐒 𝟏𝟓 𝐊𝐎𝐍𝐊𝐋𝐔𝐈 𝐅𝐎𝐑𝐌𝐀𝐒𝐀𝐔𝐍 𝐓𝐄𝐊𝐍𝐈𝐊𝐀 𝐌𝐄𝐍𝐔𝐓𝐄𝐍𝐒𝐀𝐔𝐍 𝐊𝐀𝐑𝐄𝐓𝐀

Dili, 30 juñu 2023-Emaixada Japaun iha Timor-Leste entrega sertifikadu rekoñesimentu ba Korpu Bombeiros 15, ne’ebé konklui ona formasaun kona-ba téknika manutensaun ba kareta Bombeiros 3, ne’ebé apoiu hosi governu Japaun.

Formasaun liuhusi zoom via online fasilita hosi treinadór Mr. Hiroki Aso hosi Kompañia Jonan Motor Service no Kazuhiro Morita hosi Sosiedade Promosaun Diplomásia Japaun nian.

Prezidente APC, Superientendente PNTL, Ismael da Costa Babo iha enseramentu hateten ho formasaun ba Korpu Bombeiros hanesan priveléjiu boot ba APC hodi hetan esperiénsia di’ak.

“Lori Governu Timor-Leste, Ministériu Interior, espesialmente APC fó onra no orgullu ba previléjiu bo’ot ba protesaun sivil bele hetan oportunidade aprende,esperiensia husi  péritu sira husi Japaun,” hateten Prezidente APC.

Lideransa APC haktuir Timor-Leste país ida ne’ebe moris  ho nia parseiru sira inklui Japaun.

 Iha fatin hanesan, Adjunta Xefe Misaun Embaixada Japaun iha TL, Kazumi Yamada husu ba Korpu Bombeiros sira atu rai didiak esperiénsia treinamentu iha instituisaun APC  no kontinua fahe koñesimentu ba sira seluk.

Nia hataten ba korpu bombeiros atu uza kareta bombeiros ho konfiansa, no aten barani hodi hala’o serbisu, ne’ebé importante atu proteje povu sira -nia moris no sira nia propriedade iha situsaun dezastre naturais.

 “Ami sei kontinua kolabora ho autoridade protesaun sivil no povu Timor-Leste tomak atu nune’e nasaun bele aguenta hasoru dezastre naturais oioin,” fundamenta Adjunta ne’e.

 Entretantu, atividade treinamentu hala’o durante loron 4, hosi loron efetivu 20, 21, 28 no 30 juñu 2023 ba liu Korpu Bombeiros Dili, Baukau, Kovalima inklui Bobonaro.

Formasaun ensera direita hosi Prezidente Autoridade Protesaun Sivíl, Superientendente PNTL, Ismael da Costa Babo, ho Adjunta Xefe Misaun Embaixada Japaun iha TL, Kazumi Yamada.

#CM#