𝐀𝐏𝐂 𝐒𝐎𝐒𝐈𝐀𝐋𝐈𝐙𝐀 𝐋𝐄𝐈 𝐏𝐒 𝐁𝐀 𝐋𝐈𝐃𝐄𝐑𝐀𝐍𝐒𝐀 𝐊𝐎𝐌𝐔𝐍𝐈𝐓𝐀́𝐑𝐈𝐔 𝐑𝐀𝐄𝐎𝐀

RAEOA, 09 agusto 2023-Autoridade Protesaun Sivíl liuhusi Gabinete Relasaun Externa no Komunikasaun (APC-GREK) sosializa lei protesaun sivíl númeru 12/2020 ba lideransa komunitária sira iha Sub Rejiaun Pante Makassar-RAEOA.

Komandante Operasaun APC RAEOA, Inspetór Xefe Polísia, Herman Metan iha abertura hateten APC atu mai fahe informasaun bázika kona-ba servisu protesaun sivíl nian oinsa halo atendimentu ba komunidade no populasaun sira, ne’ebé hasoru dezastre naturais.

“APC sempre servisu no kolabora ho Xefe Suku, Xefe Aldeia no komunidade sira atu servi no atende vítima dezastre naturais tuir lei haruka,” esplika Komandante APC RAEOA

Nia esklarese ho sosializasaun lei no servisu APC nian ba lideransa komunitária importante atu hatutan fali sira-nia komunidade hodi hatene APC atu iha kolabarasaun servisu hamutuk ba atendimentu emerjénsia.

Diretór GREK, Anacleto Caetano informa sosializasaun lei ne’e hanesan kontinuasaun lori informasaun lideransa komunitária no komunidade sira atu hetene lolos servisu APC nian, tanba munisípiu balun hahú sosializa uluk ona.

“Sosalizasaun lei atu fahe informasaun ba lideransa komunitária sira, atu nunee ita hotu bele la’o tuir regras no lei,” dehan Diretór GREK.

Iha fatin hanesa, Xefe Suku Costa, Aleixo Abi hateten primeira APC mai fahe informasaun liga ho protesaun sivíl ninia servisu no dezastre naturais.

“Sente kontente tebes, primeira vez mai ko’alia kona-ba dezastre naturais tanba dezastre akontese ami xefe suku no xefe aldeia sira kontatu ba mai hodi husu apoiu ba instituisaun sira, inklui APC,” haktuir Xefe Suku.

Entretantu, sosializasun Lei Protesaun Sivíl no dekrétu lei sira fasilita diretamente hosi Diretór GREK, Anacleto Caetano.