Dili, 08 setembru 2023-Prezidente Autoridade Protesaun Sivíl, Superintendente PNTL, Ismael da Costa Babo konvoka reuniaun ho Prezidente Autoridade Munisípiu Dili (PAMD), Guilhermina Ribeiro, ho reprezentante Kaza Militár hosi Palásiu Prezidensiál hodi buka solusaun atu lori fila Xefe Família 50 vítima inséndiu Karentina Tasi-Tolu ba ida-idak ninia fatin.
Prezidente APC, Superintendente PNTL, Ismael da Costa Babo hateten enkontru ida ne’e atu buka solusaun ba uma kain 50 vítima inséndiu Karentina, tanba parte APC disponivél no iha ona kondisaun atu rekopera.
“Ita-nia enkontru atu deside no ba ko’alia ho vítima inséndiu, aprosima sira hodi fó hatene ba sira, Estadu prontu atu lori sira ba, tanba APC disponivél no iha ona orsamentu Mão de Obra, Transporte no materiál konstrusaun,” hateten Prezidente APC.
Nia fundamenta APC iha kondisaun no disponivél atu rekopera, solusaun ida mak tenke kumpri ba regras ho dékretu lei númeru 7/2021 kona-ba apoiu públiku hosi Estadu ba Vítima Insedente Grave no Katástofe katak ita bele fó rekoperasaun, maibé vítima sira halo uma iha rai rasik, labele rai disputa, rai labele afeita ba risku dezastre.
Iha fatin hanesan, Prezidente Autoridade Munisípiu Dili, Guilhermina Ribeiro informa parte munisípiu Dili fasilita ona Xefe Família 2 iha kos no uma kain 10 iha Karentina Tasi-Tolu.
Autoridade Munisípiu ne’e haktuir iha Xefe Família balun hakarak fila ba sira-nia munisípiu orijén, persija halo kordenasaun ho autoridade munisípiu sira seluk hodi bele entrega direita sira ba postu administrativu no suku katak sira mai hosi ne’eba dunik.
Ho nunee, iha ekontru ekipa deside tékinku sira hosi APC sei kontinua halo aprosimasaun didiak ho família vítima hodi rona sira-nia hanoin no hakarak.
Entretantu, Xefe Família 50, ho totál membru família hamutuk 230, provizoriamente uma kain 38 hela iha kobe house Palásiu Prezidensiál Aitarak Laran akumula membru família 181, uma kain 2 hela iha uma kos kompostu membru família 7, no uma kain 10 hela iha Karentina Tasitolu ho membru família 47.
#Cipriano Mesquita