𝐀𝐏𝐂 𝐇𝐎 𝐅𝐀𝐎 𝐑𝐄𝐀𝐋𝐈𝐙𝐀 𝐖𝐎𝐑𝐊𝐒𝐇𝐎𝐏 𝐀𝐕𝐀𝐋𝐈𝐃𝐀𝐒𝐀𝐔𝐍 𝐑𝐄𝐋𝐀𝐓𝐎́𝐑𝐈𝐔 𝐀𝐕𝐑𝐏-𝐉𝐑𝐃𝐁𝐊 𝐈𝐇𝐀 𝐒𝐔𝐊𝐔 𝐊𝐀𝐑𝐀𝐔 𝐁𝐀𝐋𝐔

Vikeke, 15 Novembru 2023-Autoridade Proteção Civil (APC) liuhusi Diresaun Nasionál Jestaun Risku Dezastre (DNGRD) ho Food and Agriculture Organization (FAO) United Nations realiza workshop Validasaun no Lansamentu ba Relatóriu Avaliasaun Vulnerabilidade Risku Perigu no Planu Jestaun Risku Dezastre Baze Komunidade (AVRP-JRDBK) suku Karau Balu, ne’ebé elabora hosi membru Komisaun Jestaun Dezastre Suku (KJDS) hosi suku refere

Workshop no lansamentu envolve autoridade munisípiu, liña ministeriál, PNTL, Ajénsia, lideransa komunitáriu ONG nasionál no lokál sira iha munisípiu Vikeke hodi diskute no haree hamutuk konteúdu relatóriu AVRP-JRDBK suku Karau Balu.

Iha abertura, Administradór munisípiu Vikeke, Januário Soares “Bolly” konsidera rezultadu hosi relatóriu AVRP suku Karau Balu sei matadalan hodi utiliza ba prevensaun risku dezastre iha munisípiu Vikeke

“Ha’u hanoin servisu ida naruk hosi relatóriu ida ne’e, no sei aprezenta hodi bele hetan apresiasaun atu nunee ba oin bele utiliza hodi atu halo prevensaun no responde ba risku dezastre iha suku Karau Balu, munisípiu Vikeke,” hateten Administradór.

Autoridade munisípiu ne’e haktuir Vikeke hanesan munisípiu ida, ne’ebé mak sempre afeita ba dezastre iha tinan-tinan kuandu udan, ho estudu no leventamentu dadus ligadu risku dezastre naturais bele sai dadus kredivel atu parte governu bele fó asisténsia ho justu iha atendimentu

Iha fatin hanesan, Diretór DNGRD, Mario da Silva hateten DNGRD servisu hamutuk ho FAO iha programa pro resilénsia dezastre sei hala’o asuntu validasaun relatóriu AVRP ho planu JRDBK liuliu iha tinan kotuk suku Biblio no iha tina ne’e iha suku Karau Balu. Relatóriu ne’e sei sai matadalan ida hodi identifika risku dezastre iha munisípiu Vikeke.

Nia informa iha tinan 2023 APC fó ona apoiu rekopresaun vítima dezastre iha munisípiu Vikeke mak as liu hamutuk 243 família mak afeita liu fali munisípiu sira seluk.

Diretór mós esklarese DNGRD sempre prepradu no servisu hamutuk ho ajénsia internasionál no ONG nasionál sira hodi fó tulun no asisténsia ba família afeitadu dezastre sira iha munisípiu Vikeke nian.

Enkuantu, membru KJDS suku Karau Balu, Amancio Soares Pinto informa relatóriu AVRP aprezenta rezultadu leventamentu dadus no identifikasaun fatin risku dezastre iha suku Karau Balu, atu nunee ba oin bele halo prevensaun iha komunidade sira nia leet.

“Ami servisu hamutuk ho lideransa komunitária suku Karau Balu hodi identifika no haree ba asuntu sira hanesan inundasaun, rai monu, protesaun ba animál, protesaun ba ai horis, protesaun ba dezastre lafaek tata komunidade, bailoron naruk no tempu udan, ho risku sira ne’e sai preokupasaun komunidade sira-nian, ne’ebé sei prevene iha futuru mai,” hateten membru KJDS.

Nia esplika daudaun KJDS ho ninia forsa no kapasidade iha ona mekanizmu atu hamenus risku iha suku Karau Balu hanesan koloka kuadru avizu iha fatin risku sira hanesan lafaek tata komunidade sira, atu nunee bele evita komunidade sira atu haris iha fatin refere, ida seluk mak koloka kuadru avizu iha fatin ba rai halai no mak kuda ai horis.

Iha biban ne’e, Espesialista CBDRM FAO, Lourenço Cosme Xavier FAO kontribui ba planu prioridade APC nian liga ba asuntu dezastre nian iha aspetu hotu iha siklu dezastre nian através projetu pro rezilénsia, ne’ebé FAO kontribui fó asisténsia teknika hodi dezenvolve, kapasita komunidade sira, establese KJDS hodi prepara sira-nia an ba jestaun suku nivel komunidade nian.

Nia subliña “Apoiu FAO ba APC liuhusi akordu nota entendimentu ho durasaun tinan rua ne’ebé komplemeta ona KJDS iha suku 30 ho alvu sira no ohin loron iha suku Karau Balu tama faze segundu, faze terseiru bas uku Bibileo, Luka no Bahlarawain”.

Espesialista FAO esplika lansamentu AVRP haree aspetu no komponente 4 hanesan vulnerabilidad fíziku, ekonómia, ambiente no sosiál hodi define aldeia no suku Karau Balu tam aba tipu risku saida, hafoin hatene risku vulnerabilidade sira nunee bele fó apoiu no parte kommunidade, suku hodi bele dezenvolve sira-nia planu ba asaun risku sira ne’e.

Entretantu, durante diskusaun hetan idea no rekomendasaun hosi parte liña ministerál no ONG nasionál no lokál sira hodi enkansia mós iha relatóriu hafoin hetan apresiasaun hosi Administradór munisípiu Vikeke no Diretór DNGRD sai nuudar dokumentu no matadalan ida hodi implementa suku Karau Balu liuhusi membru KJDS sira.

Textu no Foto: Cipry (GREC-APC)