Dili, 16 Novembro 2023 – Autoridade Proteção Civil (APC), ho UNDRR organiza Workshop Validasaun Revizaun Mediu Prazu Enkuadramentu Sendai 2015-2030 ho parseiru dezenvolvimentu Sira halo iha Salaun Maubara Room, Timor-Plaza Dili.
Workshop ne’e abertura husi Prezidenti Autoridade Protesaun Sivíl, Superintendete Polísia Ismael da Costa Babo, hateten sorumutu ida ne’e importante no signifikante tebes ba pozisaun Timor-Leste nian iha mundo internasionál. “Signifikante tebes ba ita nia sorumutuk ida ne’e hodi reafirma Timor-Leste ninia pozisaun paz parte ba iha nasoens Unidas, ne’ebé sempre koopera ho rezolusoens no kualkér polítika ita adopta, liliu husi enkuadramentu sendai validasaun risku dezastre iha Timor-Leste”, dehan Ismael da Costa Babo.
Prezidenti APC ne’e mós lori Governu nia naran agradese ba parseiru sira hotu internasionál no nasionál nia partisipasaun no kolaborasaun atu nune’e bele hariku, habokur no halo boot liutan relatóriu validasaun redusaun risku dezastre iha Timor-Leste
Koordenador UN office for Disaster Risk Reduction (UNDRR), Cirilo de Jesus Lobo Baptista hateten objetivu husi workshop ne’e, atu rona pareser husi parseiru sira liga ho relatóriu ne’ebé APC prepara ona. “Objetivu husi workshop ida ne’e, atu konvida tan parseiru sira hodi rona sira nia pareser hodi integra hamutuk ba iha validasaun relatório revizaun Médiu Prazu ba Relatóriu Sendai 2015-2023, ne’ebé APC rasik mak prepara”, dehan Cirilio de Jesus Lobo Baptista.
Nia mós hatutan liutan katak dokumentus enkuadramentu sendai ne’e iha tarjetu 7 ne’ebé atu too ba: (1). Reduz Mortalidade Globál husi dezastre; (2). Hamenus número populasaun afeitado sira; (3). Hamenus perda ekonómika (GDP); (4). Hamenus estragus iha infraestrutura no serbisu básiku sira; (5). Hasae númeru Nasaun sira ho estratejia nasionál ba DRR; (6). Kooperasaun internasionál ba nasaun em dezemvolvimentu sira no (7). Hasae sistema alerta sedu no informasaun ba DRR nian.
Iha fatin hanesan reprezentante husi Organizasoens ema ho difisiénsia RHTO, Abilio Camões, espresa ninia sentimentu kontente no orgullu iha workshop ne’e. “Sente orgullu no apresia tebes ho Workshop ne’e, tamba bele konvida mos organizasoens ema ho difisiénsia atu hanoin hamutuk ba melhoramentu relatório validasaun enkuadramentu sendai 2015-2030 ne’e”, dehan Abilio Camões.
Reprezentante RHTO ne’e, rekomenda ba APC atu envolve mós ema ho difisiensia (ema ho nesesidade espesiál) iha programa sira APC nian atu wainhira mosu dezastre ruma karik sira bele hatene ona oinsa nesesidade ema ho nesesidade espesiál sira nian.
Partisipa iha workshop validasaun enkuadramentu sendai ne’e mak Prezidente APC, Superintendente Polisia Ismael da Costa Babo, WHO, CRS, UNICEF, CARE DRD, EPC proj. Asst., Caritas Australia, Plan Internasional, JICA, UN Women, RHTO enkuantu husi APC partisipa husi Adjunto Aero Mariano Ana Lopes, Adjunto Marítima Serafin da Costa no GIAI reprezenta husi Paulo Soares. Workshop ne’e, organiza husi APC no hetan suporta husi UNDRR.
Textu no Foto: Nato & Edwin (GREC-APC)