Dili, 21 Novembru 2023- Autoridade Proteção Civil (APC) liuhusi Korpu Bombeiros ho Unidade Espsiál APC hahú fase ka halo lavajen estrada públiku hosi diresaun Palásiu Governu to’o Áeroportu Internasionál Nicolau Lobato Komoro nu’udar preparasaun ba komemorasaun loron Proklamasaun Independénsia 28 Novembru ba dala-48.
Enkuantu, atividade lavajen observa direita hosi Sekretáriu Estadu Protesaun Sivíl, Domingos Mariano Reis ho Prezidenti Autoridade Protesaun Sivíl, Superintendente PNTL, Ismael da Costa Babo.
Sekretáriu Estadu Protesaun Sivíl, Domingos Mariano Reis hateten atividade lavajen ne’e, atu garante ambiente mo’os iha eventu komemorasaun loron Proklamasaun Independénsia Timor-Leste nian ba dala 48.
“Relasiona ho komemorasaun loron Proklamasaun Independénsia ba dala 48, Ita Protesaun Sivíl liuhusi Korpu Bombeiros ho ekipa fase estrada hosi Áero Portu to’o Palásiu Prezidénsia no Palásiu Governu, atu garante ambiente mo’os hodi simu bainaka VIP sira hosi nasaun seluk, ne’ebé partisipa iha eventu ne’e” esplika Sekretáriu Estadu.
SEPS esklarese ekipa Bombeiros alende fase estrada, sei rega mós ai-funan sira iha járdin parte dalan ninin hosi estrada públiku nian, atu fó imajen ne’ebé furak no ambiente fresku ba bainaka sira hodi haree sidade Dili nia furak.
Entretantu, atividade lavajen Estrada, ekipa Bombeiros ho Uniade Espesiál APS sei servisu rotina durante tempu kalan hahú hosi 21 to’o 27 Novembru 2023, ne’ebé hetan mós apoiu hosi Kompañia Pertamina International Timor SA no PNTL liuhusi Unidade Polísia Tránzitu Dili.
Envolve iha atividade lavajen kompostu hosi Komandante Operasaun Nasionál APC, Komandante Operasaun APC munisípiu Dili, inklui diretór, adjunto, xefe departamentu, xefe seksaun no funsionáriu sira.
Foto/Textu: Erwin/Nato/Cipry (GREC-APC)