Dili, 22 Novembru 2023 – Kuarta-Feira ne’e, Prezidente Autoridade Proteção Civil (APC), Superintendente Ismael da Costa Babo, halo abertura workshop Asaun Antisipatória (AA) iha Timor-Leste hamutuk ho parseirus humanitáriu sira. Hala’o iha Salaun Tower Fatuhada Dili,
Iha abertura ne’e Prezidenti APC agradese ba parseiru dezenvolvimentu sira hotu-hotu nia prezensa no apoiu husi Parseiro Nasionál no Parseiro internasionál ne’ebé liu husi asaun antisipada ba desafiu sira ne’e sai xave susesu ba ita ninia resposta.
“Ba parseirus dezenvolvimentu sira hotu, hau la temi idaidak, NGO Nasionál, ita nia liñas ministeriais sira ninia reprezentante iha ne’e. WHO, UNDP ne’ebé mak sai mos parseiru ba Governu TimorLeste. Atu hato’o deit ba ita hotu katak Asaun Antesipada ba desafiu sira ne’e sai hanesan xave susesu ba ita ninia resposta”, dehan Ismael da Costa Babo.
Nia mos hatutan tan katak liliu husi Lei Protesaun Sivíl fo mandatu ba Governu ho espesífiku ba Ministériu Interior ho SEPC hare mós assuntu ida asidente katástrofes grave sira iha prevensaun, Mitigasaun, Preparasaun Emerjénsia nomos rekuperasaun, liu husi siklu dezastre ninian ne’e sai hanesan giaun importante ida. Momentu ida agora ne’e importante tebes hodi hare ba esperiénsia passadu, Prezenti ita bele mellora diak liutan hodi bele hasoru desafius sira iha futuru.
Tuir intervensaun husi Koordenadór Jerál ba projetu Fundu Klimátiku, Autoridade Nasionál Designada (ANDI.P), António Abel Guteres hateten projeitu nebe mak agora dadauk FAO halao hela, liga ho projeitu ne’bé mak antes ne’e liu husi secretáriu Estadu Meiu Ambiente anterior assina ona akordu ida ho UNF ne’ebé mak hetan fundus ida husi GREEN Climate Fund, ho durasaun tinan lima atu fo assisténsia konaba periodu alerta sedu.
Iha fatin hanesan Sekretaria Jeral Interina CVTL Vidiana Xareal dehan CVTL hanesan Organizasaun Humanitáriu liuhusi Governu, iha rekonhesimentu legal ho decretu Lei n0. 5/2005 ho nia papel maka atu apoio ka ausiliár ba Governu iha temu emerjénsia.
Reprezentante CVTL ne’e mós kontente ho projeitu Asaun Antesipada ne’e, tamba bele hola parte iha workshop Antisipatóriu ida ne’e.
Projetu Asaun Antesipada ne’e, organiza husi FAO no hetan apoio husi Ajénsia humanitariu sira tantu nasionál no mos internasionais.
Objetivu husi Workshop ne’e, mak atu parseiru humanitáriu sira hotu atu taun hanoin hamutuk hodi hadia fila fali asaun antesipatóriu ne’ebé mak dezenvolve ona no bele iha ona grupo de traballu ba asaun antesipatóriu iha Timor-Leste.
Partisipa iha wokshop ne’e, Prezidente APC Superintendenti Ismael da Costa Babo, akompaña husi Diretór GREC Anacleto Caetano, Adjuntu Aero Mariano Ana Lopes, Adjuntu Terrestre Martinho Fátima, Adjuntu Marítima Serafin da Costa, hamutuk ho ajénsia humanitáriu nasionais no internasionais APC nian.
Tuir kalendáriu, workshop refere halao durante loron rua, hahu husi dia, 22 too 23 Novembru Semana ne’e.
Foto/textu: Nato & Cipry (GREC-APC)