Dili, 30 Novembru 2023 – Ekipa protokolu Autoridade Proteção Civil (APC) ho MNEC hala’o enkontru internál kona-bá join komisaun atu simu Delegasaun nasaun 15 husi Ázia Pasífiku iha salaun IED MNEC, Pantai Kelapa Dili, kinta-feira ne’e.
Enkontru ne’e foka liu ba preparasaun hodi simu delegasaun nasaun 15 husi Ázia pasifiku nian, ne’ebé mai iha Timor-Leste atu partisipa iha semináriu rejional sivíl-militar 9th nível Ázia nian. Enkontru ne’e diriji husi Diretór Jerál asuntu protocolar no serimoniál MNEC, Hermengjildo Custodio da Silva,S.Pd.,MM, hamutuk ho Presidente Komisaun Organizadora husi Autoridade Protesaun Sivíl Mariano Ana Lopes, atuál Adjuntu Aero APC,
Prezidente Komisaun Organizadora, Atuál Adjunto Aero, Mariano Ana Lopes hateten, Enkontru APC ho MNE, foka liu ba preparasaun simu delegasaun husi nasaun 15 Ázia pasífiku.
“Adjunto realsa tan katak, Enkontru APC ho Ministrériu Negósio Estranjeiru ne’e, halo preparasaun ba eventu boot ida rejionál konsultativu group ba dala 9 nian husi Ázia Pasífiku, kuaze nasaun 15 mak mai partisipa iha eventu ne’e”. dehan Mariano Ana Lopes. Nia hatutan liutan katak APC ho MNEC koordena liután assuntu protokolu nian, transporte, fatin hela nian atu susesu iha eventu ne’e.
Iha fatin hanesan, Diretór Jerál MNEC assuntu protokolu Serimoniál, Hermenegildo Custodio da Silva, fortifika liutan katak join komisaun MNEC ho APC ne’e preparadu tamba diresaun hotu partisipa di’ak tebes.
“Komisaun ne’e diak tebes no diresaun hot-hotu preparadu, ligasaun ho transporte, protokolu atendimentu entrada ho saída fatin mós preparadu”. Haktuir Reprezentante MNEC ne’e, nia salienta liutan katak MNEC sei update nafatin ho Protesaun sivíl para hare preparasaun sira hotu di’ak.
Iha enkontru ne’e, APC ho MNEC fahe tarefas servisu ba malu, liuhusi desijaun akumulativu ida ba komisaun sira ne’ebé sei estabelese ajenda ba preparasaun simu delegasaun sira no oinsa lao tuir sistema protokolu nia substánsia servisu ne’ebé iha ona hodi iha tratamentu ne’ebé hanesan ba delegasaun sira ne’e. Tuir ajenda protokolu nian hahu husi ajenda ne’ebé preparadu ona, tuir programas eventuál refere, iha eventu ne’e mós sei iha servisu hamutuk ho Ministériu Saúde, F-FDTL, Sevisu Migrasaun-MI no Komandu Polísia Dili no Ministériu Turizmu.
Partisipa iha enkontru ne’e, MNEC, adjuntu Aero Mariano Ana Lopez, Diretór GPEA APC, Gustavio José Lopez, Vise-Prezidente Komisaun APC, Agostinho Cosme Belo no António Viegas, reprezentante Komandante Trânzito PNTL Munisípiu Dili, Komandu Sentru Formasau APC no ekipa APC ne’ebé sei apoiu durante vizita delegasaun husi nasaun 15 iha Seminário Rejionál Ázia no Pasífiku.
Foto/Textu: Nato & Edwin (GREC-APC)