Lautém, 08 Dezembru 2023- Autoridade Proteção Civil (APC) liuhusi Autoridade Protesaun Sivíl Munisípiu Lautém organiza atividade ba selebrasaun loron Mundiál Redusaun Risku Dezastre 13 Outobru iha Suku Afabubo, Postu Administrativu Luro, Munisípiu Lautém, Sexta-Feira semana ne’e.
Tema prinsipal ba selebrasaun Loron Mundiál dezastre ne’e maka “Promove Partisipasaun Grupu Vunerável sira ( Ema ho difisiénsia, Idozu feto no Labarik) iha Redusaun Risku Dezastre ba Rezilénsia moris di’ak iha Timor-Leste”.
S.E Sekretariu Estadu Protesaun Sivil, Domingos Mariano Reis hato’o nia agradese wain ba APC munisípiu Lautém hamutuk ho Komunidade Suku Afabubo ne’ebé selebra loron Mundiál Redusaun Risku Dezastre, “Hakarak agradese wain ba APC Munisípiu Lautém no Komunidade Suku Afabubo ne’ebé iha inisiativa ne’ebé di’ak atu halo selebrasaun ba loron Mundiál Redusaun Risku Dezastre ida ne’e hamutuk ho komunidade Afabubo” dehan SEPC
Iha ambitu selebrasaun loron Munidál dezastre ne’e, Sekretáriu Estadu Protesaun Sivíl hatutan dezastre sai ameasa ba vida umana nomós estraga buat oin-oin husi kauza fenomena natural tantu mós husi ema nia hahalok
“ Dezastre naturais sai amesa no perigu ba vida uma ema ida-idak nia moris kauza husi fenómena natural no bele mós husi ema nia hahalok ne’ebé bele kontribui mós ba dezastre tamba tesi ai abiru no la konserva didi’iak ita nia Ai-hun , be’e matan, foho lolon, tasi nomós ita nia mota sira nune’e bele prevene bainhira mosu dezastre naturais” dehan Sekretáriu Estadu Protesaun Sivíl S.E. Domingos Mariano Reis.
Governante ne’e mós reforsa tan katak iha ninia mandatu nia sei halao programa prioridade rua hodi hamosu Diresaun foun ruma hodi haforsa servisu Protesaun Sivíl iha Timor-Leste.
“ Iha ha’u nia mandatu sei hamosu tan diresaun mitigasaun no prevensaun ba redusaun risku dezastre nune’e atu fó edukasaun ba komunidade hanesan tarjetu ho nia indikador husi Aldeia, Suku iha Teritóriu tomak hodi fó edukasasun ho tópiku Redusaun Risku Dezastre iha ita nia rain, nomós sei serbisu hamutuk ho Ministériu Edukasaun atu integra tópiku ida kona-bá Redusaun Risku Dezastre hodi hanorin regularmante iha eskola liuhusi nota intendiementu ruma nune’e fásil atu estudante sira tranforma no kanaliza informasaun ba nia família sira “ hatutan Governante SEPC
Iha Selebrasaun ne’e Protesaun Sivíl mós halo distribuisaun sasan no material konstrusaun ba vítima dezastre naturais nomós apoia umanitária ba ema kbiit laek sira ema ho difisiensia sira hamutuk 100 (atus ida)
Selebrasaun loron Mundiál redusaun Risku Dezastre Munisípiu Lautém hetan apoia husi UNFAP, ADRA, CRS, CVTL, Chilfund, Fraterna, no Prospek
Eventu ne’e hetan partisipasaun husi S.E. Protesaun Sivíl Sr. Domingos Mariano Reis, Diretór GPEA Sr. Gustávio José Lopes, Diretór GIAI Sr. Valdomar, Diretór Mário da Silva Lopes ho nia estrutura tomak, Reprezenta MI, Rep. Administrador Munisípiu Lautém ho nia estrutura iha Postu Administrativu Luro, Parseiru Dezenvolvimentu husi NGO lokal no Internasionál, membru APC Munisípiu Lautém tomak no Komunidade Afabubo tomak.
Foto/Textu: Mateus (GREC-APC)