Dili, 22 Janeiru 2024-Segunda-Feira Semana ne’e, Prezidente Autoridade Proteção Civil (APC), Superintendente Polisial Ismael da Costa Babo, akompaña husi Komandante Operasaun Nasionál APC, halao enkontru ho ajénsia World Food Programme (WFP) ne’ebé xefia husi Head of Supply Chain, Patrick Mills Lamptey. Enkontru ne’e halao iha Salaun Interna APC, Kaikoli Dili.
WFP nu’udar parseiro Humanitária Autoridade Protesaun Sivíl nian, ne’ebé durante ne’e, sempre apoiu no suporta Autoridade Protesaun Sivíl iha fornesimentu aihan nomós sempre apoiu APC iha eventu importante sira ne’ebé liga ho mitigasaun no prevensaun ba redusaun risku dezastre iha Timor-Leste. Nune’e, objetivu husi enkontru parseria refere, atu hametin liutan komitmentu entre APC ho world Food Programme (WFP) iha kooperasaun no parseria hodi fornese seguransa alimentar no materiais lojístiku nia ba APC atu bele mellora liután servisu APC nian.
“Obrigado barak, hau naran Patrick Mills Lamptey, Xefe Fornesedór Aihan WFP, foin rematan enkontru ho Prezidente Babo, nebe servisu ba lojístiku no seguransa Alimentar iha nasaun ne’e. Kolaborasaun ho parseiru sira no oinsa operasionaliza, estandar espesífiku ho ninia prosedimentu operasionais sira, no servisu hodi hare ba eventu atuál hanesan El-Nino, nune’e mos kontinua fortifika liutan suporta aihan sira no kontinua estok ekipamentu sira hanesan lijístiku nian”. Esplika, reprezentante WFP ba Média APC hafoin de remata enkontru ho Prezidente APC. Nia tatutan tan, WFP ho APC kontinua servisu hamutuk iha kooperasaun no parseria tamba WFP sempre prontu nafatin apoio APC iha eventu importante sira.
Iha sorin seluk, Prezidente Autoridade Protesaun Sivíl, Superintendente Polisia Ismael da Costa Babo, husu nafatin ba WFP atu servisu hamutuk no kolaborasaun atu kontinua apoio APC, iha parte aihan no ekipamentu sira.
“Husu ba WFP ativu kolaborasaun servisu no kontinua Apoio APC, hanesan ita bot sira hatene ami ninia estok hahan iha nasionál agora dadaun mamuk. Ida ne’e mak problema ida ne’ebé ita hasoru, maibe ita fiar katak CLN ho MCI sei esforsu hodi organiza estok nasionál iha tempo badak nia laran”, haktuir Prezidente APC ne’e.
Partisipa iha enkontru parseria ne’e, Prezidente APC, akompaña husi Komandante Operasaun Nasioná APC Nuno Romualdo Gomes hamutuk ho ekipa asesoria APC. Enkuandu ajénsia humanitária WFP reprezenta husi Patrick Mills Lamptey, Head of Suplly Chain.
Foto & Textu : Nato (GREC-APC)