𝐀𝐒𝐄𝐀𝐍 𝐒𝐄𝐊𝐑𝐄𝐓𝐀𝐑𝐈𝐀𝐃𝐔 𝐅𝐎́ 𝐓𝐑𝐄𝐈𝐍𝐀𝐌𝐄𝐍𝐓𝐔 𝐉𝐄𝐒𝐓𝐀𝐔𝐍 𝐃𝐄𝐙𝐀𝐒𝐓𝐑𝐄 𝐁𝐀 𝐅𝐔𝐍𝐒𝐈𝐎𝐍𝐀́𝐑𝐈𝐔 𝐀𝐏𝐂

Dili, 21 fevereiru 2024-ASEAN Sekretariadu kompostu hosi Dr. Riyanti Djalante ho Akbar Meirio fasilita treinamentu ba kargu diresaun no kargu xéfia, inklui funsionáriu hosi diresaun tutela Autoridade Protesaun Sivíl (APC) kona-ba “ASEAN Disaster Management and Humanitarian Assistance Sector Cooperation” durante loron tolu (3) iha salaun APC, Kaikoli.

Sua Exelénsia Sekretáriu Estadu Protesaun Sivíl, Domingos Mariano iha entrevista hateten liu hosi kapasitasaun rekursu umanu APC nian, atu hasa’e kuñesimentu hodi prepara atu responde dezastre iha Timor-Leste.

“Objetivu ba loron ohin atu kapasita ita-nia kargu xéfia sira, oinsá atu hasa’e kuñesimentu sira-nia jestaun nu’udar jestór bele jere ita-nia rekursu sira, hodi prepara responde no rekopera ba vítima dezastre sira nemak dehan katak one ASEAN, one respond,” esplika Sekretáriu Estadu.

SEPC fundamenta bainhira Timor-Leste atu adere sai membru permanente ba ASEAN kriteira ida maka kapasitasaun rekurusu umanu Timor-Leste nian, bele garante no sufisiente ona atu adere ba ASEAN.

Iha biban ne’e Reprezentante ASEAN Sekretariadu, Dr. Riyanti Djalante Agradese ba Oportunidade lori ASEAN Sekretariadu no AHA Center apresia ba Governu Timor-Leste ne’ebé organiza programa formasaun ASEAN Travelling Resource Program Person (ATRPP) iha Dili.

“Formasaun loron tolu ne’e sei fasilita formasaun husi ASEAN Sekretariadu no AHA CENTER konvida ita-boot sira bele aprende no estuda hamutuk mekanizmu servisu sira kona-bá ASEAN liuliu partilla ba malu esperénsia, dezafiu sira iha baze bainhira hasoru dezastre” hateten Reprezentante ASEAN Sekretariadu

Nia hateten “Jestaun Risku Dezastre no Asisténsia Humanitária hanesan área ida ne’ebé hetan progresu implementasaun maka’as.”

Fasilitadora esplika nasaun ASEAN hanesan rejiaun ida ne’ebé nia mapa lokalizasaun nakonu ho dezastre oi-oin iha mundu enkuantu iha mudansa klimátika aumenta mós frekuénsia dezastre foun ne’ebé ASEAN hasoru tan hanesan inundasaun no sira seluk.

Nia konsidera Timor-Leste faz parte mós iha nasaun ASEAN iha ASEAN Committee on Disaster Management dadauk ne’e tamba ne’e mak Timor-Leste liuhusi Protesaun Sivil sempre tuir programa, enkontru no formasaun sira ligadu ho jestaun Risku dizastre iha ASEAN.

Iha sesaun treinamentu, Prezidente Autoridade Protesaun Sivíl, Superintendente PNTL, Ismael da Costa Babo aprezenta mós kona-ba Jestaun Dezastre iha Timor-Leste, inklui funsionamentu servisu APC nian iha atendementu ba dezastre no asisténsia umanitária ba vítima dezastre sira.

Enkuantu, liga asuntu jestaun dezastre no asisténsia umanitária parte importante ida iha programa ASEA nian.

Entretantu, treinamentu durante loron tolu (3) fasilita mós hosi parte ASEAN Sekretariadu, AHA CENTER no MOFA.

Liuhusi dezafiu sira ne’e, Nasau membru ASEAN kria ASEAN Committee on Disaster Management (ACDM ) hamosu Kompromisu ida mak hanaran AADMER (ASEAN Agreement on Disaster Management) nune’e bele aumenta kapasitasaun membru ASEAN sira hasoru dezastre liuliu halo Prevensaun, Mitigasaun, Responde no Rekoperasaun husi Dezastre iha rejiaun ASEAN.

Prepasaun Timor-Leste nia adezaun ba ASEAN, ASEC iha responsabilidade hodi fo kapasitasaun Rekursu humanu ba funsionáriu Estadu Timor-Leste nian nune’e bele hatene lalaok sira kona-bá ASEAN iha Futuru .

Programa ATRPP ida ne’e hetan suporta husi governu Australia ba pilar tolu ASEAN mak hanesan Pilar Polítika no Seguránsa Komuniade ASEAN (APSC) , Pilar Ekonómia Komunidade ASEAN (AEC) no ikus liu Pilar Sosial & Kultura Komunidade ASEAN (ASCC) nune’e Disaster Management tutula iha ASCC.

Programa ATRPP ida ne’e hanesan rekomendasaun husi Timor-Leste kona-bá adoptasaun Roadmap ba Timor-Leste nia adezaun totál ba ASEAN.