Dili, 25 abril 2024-Autoridade Protesaun Sivíl (APC) liuhosi Korpu Bombeiros komemora nia ezisténsia no aniversáriu ba dala (XXIV) ka 24 iha Timor-Leste ho tema “Bombeiros teknikamente prepradu, disiplina, seriedade iha dedikasaun, profesionalizmu no uza mekanizmu ne’ebé adekuadu hodi halo atendimentu ba sidadaun tomak iha Timor-Leste.”
Marka prezensa iha serimónia Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Asanami Sabino, Ministru Interior, Francisco da Costa Guterres, Sekretáriu Estadu Protesaun Sivíl, Domingos Mariano Reis, Sekretáriu Estadu Florestas, Fernandinho Vieira, Sekretáriu Estadu Asuntus Toponímia no Organizasaun Urbana, Germano Santa Brites Dias, Brigadeiru Jenderál F-FDTL, João Miranda Aluk Descartes no Segundu Komandante Jerál PNTL, Komisáriu Pedro Belo.
Iha diskursu, Vise Primeiru Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Asanami Sabino husu ba Bombeirus tenke kompri dever, repátria ninia fuan, ninia laran prinsípiu atu salva ema, prinsípiu salva sira ne’ebé maka momentu difisil nia laran ida ne’e maka misaun importante.
Vise PM konsidera konsidera Bombeiros hamriiik iha tempu naruk no maduru ona, tanba ne’e governu kontinua tau matan no reforsa instituisaun ne’e.
“Bombeiru la’o ona iha tempu naruk ho tinan 24 hatudu katak ita mesak tasak daudaun ona, ita komesa bele hamrik ona. Ita husu nafatin Ministru Interior ho Sekretáriu Estadu Protesaun Sivíl atu apoiu nafatin hodi reforsa liutan iha instituisaun ne’e,” esplika Governante ne’e.
Nia hateten instituisaun Bombeiros tenke forte hodi halo protesaun ba tasi, ba dezastre ne’ebé iha tasi laran, dezastre ne’ebé iha rai maran liuliu iha inundasaun klimátika, inundasaun iha fatin sira ne’ebé maka dalaruma nia forsa maka lato’o, dalaruma nia materias, ne’ebé maka lato’o tanba ne’e ita presija fó atensaun ba fasilidade Bombeiros nian.
Membru Governu agradese mós ba nasaun sira hosi Portugal, Australia, Nova Zelándia, Indonésia no nasaun seluk ne’ebé apoiu ona hasa’e kapasidade instituisaun Bombeiros nian hodi servi povu no nasaun ida ne’e.
Vise Primeiru Ministru katak “atu nafatin iha kontinuadade ba servisu Bombeiros nian mak persija rekruta tan jerasaun foun atu reforsa instituisaun, disiplina, dinamika, mudansa, atendimentu ba krize, atendimentu dezastre sira ne’e liuliu iha 4 de abril tinan tolu ka haat liu ba kuaze dili laran mout hotu kedan, iha ne’ebá ema hotu halai liubá bombeirus, ema hotu halerik ba bombeirus, Bombeirus mak hakas an hodi halo servisu no atende komunidade sira.”
Ikus liu, Governu lori nonu Governu Konstitusionál hato’o parabéns ba Bombeiros no importante atu fó kontinuidade, fo espiritu herois sira nian atu bele fó kontiunuidade lao ba oin.
Iha fatin hanesan, Sekretáriu Estadu Protesaun Sivíl, Domingos Mariano Reis hateten Aniversáriu Bombeiros Timor-Leste nian, Bombeiros eziste ona tinan 24, hahú husi tinan 2000 to’o 2024. Ezisténsia bombeiros atu servi no proteje povu Timor Leste husi ameasa dezastre nian tantu dezastre iha Terrestre, dezastre iha Aero no dezastre Marítima.
SEPC liuhosi ninia mensajen “Bombeiros nafatin mantein profisionalizmu, prontu 24 oras hodi responde nesesidade povu nian liu-liu ba kauza dezastre no katástrofes nian iha Timor-Leste”.
Ekipa Kobertura Media GREC-APC