Vikeke, 29 abríl 2024-Ekipa Sekretaria Estadu Protesaun Sivil, Autoridade Protesaun Sivíl (SEPC-APC) halo diálogu ho lideránsa komunitária no komunidade uma kain 14, ne’ebé tinan-tinan sempre afeitadu ba risku dezastre, mota Welolo iha aldeia Uma Boot, Suku Luka, Postu Administrativu Vikeke Vila.
Durante diálogu komunidade afeitadu no lideransa komunitária aldeia, Uma Boot, suku Luka hato’o sira-nia preokupasaun ho sira-nia situasaun moris hela iha fatin la seguru no risku ba dezastre naturais tanba sira deklara prontu no hakarak muda sira-nia hela fatin hodi harii fali uma fatin foun no seguru.
Iha okaziaun ne’e, Delagadu aldeia Uma Boot, suku Luka, Mariano Mendonça esplika situasaun mota Welolo sobu komunidade sira-nia uma kuaze tinan tolu ka haat, situasaun to’o agora, família afeitadu sira mós hakarak muda hosi fatin, maibé husu Governu tenke prepara buat ruma ba komunidade sira.
“Hakarak hatoo de’it ba SEPC-APC situasaun mota sobu komunidade sira-nia uma iha aldeia Uma Boot, suku Luka, beibeik ona. Ita-boot sira ho ami hasoru malu dala rua ona, ami iha esperansa boot ba ita-boot sira, ami lakoi ko’alia barak, ha’u lori família afeitadu sira katak buat seluk ami la husu, atu dehan de’it ami prontu muda, maibé Governu tenke apoiu mos buat ruma ba ami,” hateten Delgadu.
Hatan ba prokupasaun komunidade afeitadu, Komandante APC, munisípiu Vikeke Inspetór PNTL, Matias da Silva hateten atu hetan apoiu rekoperasaun ruma hosi APC persija aprezenta dadus ka lista uma kain sira afeitadu, nunee hodi halo uluk verifikasaun.
Depois konklui diálogu ekipa SEPC-APC ho parseiru CARE kontinua ba observa sentru evakuasaun ba atendimentu dezastre nian, ne’ebé harii hosi komunidade sira iha aldeia Uma Boot, suku Luka ho kondisaun at hela.
Foto/textu: Cipry (GREC-APC)