Dili, 30 Abril 2024, Prezidenti Autoridade Protesaun Sivíl, Supreintendente PNTL Ismael da Costa Babo, akompaña husi Komandante Operasaun Nasionál APC, Sup. Asistente Polisia Nuno Romualdo Gomes, iha tersa-feira ne’e hasoru malu ho delegasaun FAO (Food and Agriculture Organization) of the United Nations iha salaun interna APC Kaikoli Dili. Objetivu husi surumutu ne’e, parte rua ko’alia liu kona-bá kooperasaun entre APC ho FAO liga ho Mapa Roteiru Asaun Antisipatória.
Durante enkontru Prezidente APC Sup. Intendente PNTL Ismael da Costa Babo aprezenta mos lejislasaun no organograma APC nian ba delegasaun FAO ne’ebé lidera direitamente husi Senior Resilience officer, Hang Thi Thanh Pham.
Aleinde de relata lejislasaun, organograma iha fatin hanesan prezidenti APC ne’e relata mós progresu servisu no dezafius sira APC nian.
“Ami iha dezafiu lubuk ida, hanesan ita bo’ot sira hatene katak hanesan instituisaun foun ami iha limitasaun entermus finansa, edifísiu, sistema alerta sedu, fatin evakuasaun no seluk tan, nune’e ami presiza nafatin ita bo’ot sira nia apoiu no konsiderasaun”.
Iha fatin hanesan senior resilience officer hateten nia senti haksolok marka prezensa iha enkontru ne’e atu ko’alia hamutuk kona-bá asaun antisipatória nian.
“Hau haksolok tebes mai iha ne’e atu ko’alia kona-bá asaun antisipatória ne’e adisionál tebes liliu ba organizasaun mundiál sira hanesan FAO atu hare’e ba oinsa kontekstu ne’ebé posível no servisu hamutuk ho imi atu dezemvolve liuhusi imi nia esperiénsia no koñesimentu”.
Nia hatutan tan katak FAO servisu hamutuk ASEAN ba tempu naruk ba área globál asaun antisipatória, senior resilience officer FAO nian ne’e iha esperansa bo’ot hodi konvida Timor-Leste bele partisipa iha konferénsia Ázia pasífiku fulan outubro iha nasaun Filipina no ajenda globál mak ko’alia kona-bá asaun antisipatória no oinsa atu tranforma dalan manajementu dezastre nian, oinsa manajementu ba responde nian no seluk tan.
Iha okaziaun ne’e prezidenti APC agradese ba FAO no nia konsidera planu mapa roteiru ba asaun antisipatória ne’e nudar oportunidade osan mean husi planu FAO nian ne’ebé prioridade tebes no mehi ida ne’ebé ema hotu hein hela. Pessoa primeiru iha APC ne’e mós iha esperansa katak mapa routeiru Asaun Antisipatória ne’e fulan Dezembru bele karik lansa ona ba públiku.
Partisipa iha enkontru refere Komandante Operasaun Nasioál APC, Coordenador FAO iha Timor-Leste hamutuk ho ekipa.
#Textu Natu Soares Foto Basilio Vieira#