Baucau, 31 Maiu 2024-Komando Autoridade Protesaun Sivíl (APC) Munisipiu Baucau lidera husi Inspector Polisia Aleixo Ximenes, ho funsionáriu APC Munisipiu Baucau halo asesmentu ba vítima sira ne’ebé nia uma hetan estragus kauza husi konflitu entre joven ne’ebé akontese iha 29 Maiu 2024, Iha Postu Administrativu Baucau Villa, Area Teulale,
Hafoin asesmentu servisu ekipa ne’ebé kompostu husi Autoridade Protesaun Sivil Munisipiu Baucau, Dezastre Munisipal, Administrador Postu Baucau Villa, fó kedas apoiu emerjénsia ba vítima hamutuk uma kain 13 ne’ebé identifika, husi uma kain 13 ne’e husi Postu Administrativu Baucau Villa, Suku 3 no Aldeia 6 mak hanesan, Suku Tirilolo, Aldeia Lutumutu, uma kain 2, Aldeia Betulale uma kain 3, Suku Caibada, Aldeia Data-Ua uma kain 1, Aldeia Boru-Baha uma kain 1, Suku Bahu, Aldeia Ana Ulo uma kain 5, no Aldeia Ro-Ulo uma kain 1.
Aleinde fó apoiu emerjénsia ba vítima ne’ebé nia uma hetan estragus kauza husi konflitu, Autoridade Protesaun Sivíl Munisipiu Baucau fó mós apoiu emerjénsia ba família vítima husi Postu Administrativu Quelicai, Suku Letemumo, Aldeia Uaidora, vítima lakon iha 25 Maiu 2024 no hetan fali iha 28 Maiu 2024 ho kondisaun mate ( Isin balun asu estraga).
Ekipa konjuta ne’ebé servisu hamutuk ho APC Munisipiu Baucau hodi fó apoiu emerjénsia mak hanesan Diretur Dezastre Munisipal Clementino Pedro Barbosa Xefe Departementu Jestaun Risku Dezastre Munisipal, Xefe Departementu Jestaun Formasaun Munisipál, Administrador Postu Baucau Villa Aires de Fatima Correia.
Aliya Guterres Media APC Baucau.