Baucau, 24 Juñu 2024- Komando Autoridade Protesaun Sivíl (APC) Munisípiu Baucau liuhusi Corpo Bombeiros ohin hahú formasaun kona-bá “Seguransa kontra inséndiu no Resgate Salvamentu”
Iha abertura Diretur Diresaun Nasional Bombeiros (DNB) hateten ba partisipante sira katak “Resiklajen ne’ebé ita hala’o ne’e ita nia papél, durante ne’e ita lahalo maibé liuhusi formasaun ida ne’e ita halo fila-fali tamba ida ne’e maka servisu Bombeiros nia papél intimu, tinan barak mak ita husik hela no ita haluha matéria jerál barak maibé liuhusi formasaun ne’e ita halo revijaun fila-fali hodi fó hanoin mai ita katak ida ne’e mak ita nia papél “.
Aleinde ne’e formador Luis de Araujo da Silva mós hateten katak objetivu husi formasaun ne’e maka Resiklajen fila-fali ba matéria ne’ebé mak anteriormente sira hotu hetan ona maibé hanesan ema dalaruma sira haluha entau momentu hanesan ne’e fanun fali sira atu iha hanoin no atensaun kuidadu nafatin iha situasaun sira ne’e hodi hasoru kualker situasaun ne’ebé fó ameasa ba povu no komunidade sira ne’ebé maka hetan dezastre iha situasaun emerjénsia sira prontu ona 24 oras atu halo salvamentu ba situasaun sira ne’e.
Formasaun ne’e hala’o durante loron 2 hahú 24-25 Juñu 2024.
Formasaun ne’e hala’o iha edefísiu Autoridade Protesaun Sivíl Munisípiu Baucau no partisipante hamutuk 34 pesoas.
Aliya Guterres Media APC Baucau