Bobonaro, 23 Jullu 2024-Autoridade Protesaun Sivíl (APC) liuhosi Diretór Gabinete Relasaun Externa no Komunikasaun (GREK), Cesario da Silva Maruqes ho Xefe Unidade Operasaun Terrestre, Martinho Fatima envole iha sorumutu preparativu ba simulasaun Protokolu Asaun Sedu ba Asaun Antisipatóriu inundasaun iha salaun CVTL, Maliana Vila.
Sorumutu preparasaun ba asaun antisipatóriu organiza hosi World Vision konsórsiu Australian Humanitarian Partnership (AHP) nuudar parte ida hosi projetu Disaster Ready ka Prontu ba Dezastre.
Diretór GREK, Cesario da Silva Marques iha abertura introdús APC liuhosi GREK iha papel ida atu divulga informasaun hosi media ne’ebé kredivel ba komunidade liga ho servisu APC nian iha asuntu dezastre naturais.
Diretór esplika servisu APC-GREK nian mak halo koperasaun nasionál no internasionál tanba ne’e koperasaun nasionál kopera ho ajensia sira ne’e eziste, inklui mos ajensia konsorsiu AHP.
Liga ba simulasaun, Direjente másimu GREK konsidera simulasaun asaun antisipatória importante atu fo hanoin no prepara komunidade sira hodi hases an hosi situasaun risku dezastre iha sira-nia hela fatin.
“Liafuan ida asaun antisipatoriu mais importante tebes ba ita hotu, se ita antisipa antesbdiak liu, no depois akontese buat ruma, ita bele fo hanoin ba ita-nia komunidade sai hanesan modalidade neebe bele hasoru asaun dezastre sira,” hateten Diretór Cesario.
Lideransa GREK haforsa ho sentidu simulasaun atu halo saida, sentidu simulasaun ho intensaun diak tebtebes ba komunidade sira iha aldeia, atu fo konesimentu ba komunidade, prepara komunidade sira rasik, nunee bele hatene evakua baibhira hetan dezastre.
“Ita fo konesimentu diak ba ita nia komunidade, simulaun ita fo seguransa masimu, ita prepara komunidade sira , labele ita mak ba halo falo fali simulasaun ba sira, husik komunidade rasik mak halo simulasaun atu nunee sira bele hatene hodi evakua no hases-an ba fatin seguru,”fundamenta Diretór.
Iha fatin hanesan, Reprezentante Prezidente Autoridade Munisipiu Bobonaro, Julio Verdial Barros husu ba lideransa komunitáriu suku Goulolo ho Ilatlau liuliu xefe suku aldeia atu kontribui ba programa simulasaun asaun antisipatoriu hanesan asaun di’ak hodi eduka komunidade sira no komunidade sira tenke partisipa ativu iha prosesu ida ne’e.
Entretantu, sorumutu preparasaun ba simulasaun ida ne’e hanesan inisiu atu exprimenta no pratika ida, molok implementa iha aldeia Suriobo, suku Goulolo, postu administrativu Kailako, munisípiu Bobonaro iha loron 25 jullu 2024.
Cipriano GREC-APC