Lia hirak ne’e hato’o husi Komandante Unidade Espesiál Protesaun Sivíl –Autoridade Protesaun Sivíl; Fernando da Costa, bainhira halo enseramnetu ba prátika formasaun kontinuasaun kona-bá Buska no Salvamentu ba membru UEPC, iha loron sexta-feira, 23/08/2024 iha área Loes, Suku Loes, Postu Administrativu Loes, Munisípiu Liquiça.
Komandante UEPC-APC; Fernando da Costa salienta katak material Buska no salvamentu laos uza de’it ba inséndiu maibé mós uza ba área insidenti oi-oin ne’ebé komunidade sira hasoru.
“Buska no Salvamentu laos de’it ba inséndiu maibé ba iha área sira ne’ebé ita nia komunidade sira hasoru hanesan insidenti monu iha rai naruk ka lakon iha foho sira, ita sei uza materia ida ne’e . Tamba ita mai iha fatin ida ne’e, atu halo prátika buska no salvamentu iha foho sira, kuandu ita nia komunidade lakon karik, ita iha maneira atu bele halo buska no salvamentu” dehan Fernando da Costa Komandante Unidade Espesiál Protesaun Sivíl.
Iha sorin seluk Xefe Departamnetu Buska no Salvamentu-UEPC ; Luis de Araujo hanesan mós instrutór ba formasaun ne’e hateten katak servisu Unidade Espesiál Protesaun Sivíl (UEPC), abrangel area ne’ebé boot teb-tebes.
“Serbisu UEPC (Unidade Especial Proteção Civíl ) abrangel área ne’ebé boot teb-tebes no agora dadauk Unidade Especiál prontu no treinadu iha área buska no salvamentu, ba ema ne’ebé lakon nomós ba ema sira iha perigu material perigosas nian” tenik Xefe Departamentu Buska no Salvamentu –UEPC, Luis de Araujo
Luis de Araujo hanesan mós Instrutór ba formasaun ne’e, hatutan katak iha área operasoens sira iha terenu ne’ebé importante tebes maka komunikasaun.
“ Iha situasaun sira ne’ebé mais importante iha formasaun sira ne’e maka ita bolu komunikasaun. Parte komunikasaun agora neste momentu Unidade Espesiál Protesaun Sivíl, komunikasaun sei mínimu teb-tebes, liuliu iha área operasionál, iha situasaun treinamentu sira hanesan ne’e presiza komunikasaun atu nune’e sira preparadu kedas agora hodi hasoru situasaun saida de’it mak mosu mai katak membru UEPC pronto iha kuarker situasaun liuliu ihga área buska no salvamentu nomós ba área nesesidade ba akontesementu ne’ebé husu tulun ba unidade ida ne’e “ dehan Luis de Araujo Xefe Departamentu Buska no Salvamentu-UEPC.
Formandu Domiber Tomas dos Reis Noronha Soares hanesan Komandante Korpu Bombeiros Munisípiu Manatuto fó apresiasaun ba Unidade Espesiál Protesaun Sivíl ne’ebé oferese ona biban ba sira hodi aprende di’ak liutan material kona-bá buska no salvamentu.
“Ha’u hakarak apresia tebtebes, tamba liuhusi formasaun Buska no Salvamentu bele aumenta tan ami nia kapasidade, iha area operasionálmente, nomós ami bele aumenta ami nia mentalidade oinsa atu bele salva ita nia komunidade liuhusi kualker risku dezastre”
Iha biban ne’e mós formanda filomena Lay Fernandes hateten katak formasaun material buska no salvamentu ne’e importante tebes no sai hanesan bukae ka esperiénsia ba sira bainhira hasoru situasaun dezastre ruma iha terenu
“Formasaun buska no salvamentu ne’e importante tebes mai ami hanesan bukae no esperiénsia mai ami bainhira hasoru situasaun realidade ruma karik ami iha ona esperiensia oinsa atu atu buska no salva vítima iha asidente, no dezafiu ne’ebé mak ami hasoru durante treinamentu maka seidauk hatene liu uza ekipamentus sira nomós ho dezafiu seluk mak bainhira ami halo exersisiu tamba formasaun ida ne’e presiza duni ema ne’ebé ho fíziku di’ak tamba ne’e ami presiza prepara-an didi’ak hodi partipa formasaun sira tuir mai”
Formasaun Buska no Salvamentu ba UEPC ida ne’e la’o durante loron 5 ho teoria loron 2 nomós prátika loron tolu, hodi halo mós simulasaun kona-bá buska no salvamentu, inklui halo relatóriu ba akontesementu refere liuhusi ekipa 3 ba prátika buska no salvamentu ninian mak hanesan ekipa Alfa, ekipa Bravo no ekipa Charlie.
Partisipa formasaun Buska no Salvamentu hamutuk nain 32 husi UEPC, inklui Korpu Bombeiros Manatuto nain 5, Kazuais-UEPC 14 no voluntáriu nain 3.
Micho GREC-APC