Viqueque, 18 Setembru 2024-Autoridade Protesaun Sivíl (APC) Munisípiu Viqueque simu vizita trabalhu Sua-Exelénsia Prezidenti Autoridade Protesaun Sivíl: Jesuino dos Reis Matos Carvalho ho nia komitiva iha edefísiu APC Munisípiu Viqueque.
Vizita ida ne’e, hanesan vizita dahuluk Prezidenti APC; Jesuino dos Reis Matos Carvalho hafoin simu posse iha fulan rua liu bá iha loron 19/07/2024. Atu haforsa estrutura iha baze liuliu iha munisípiu sira hodi hare’e no rona preukupasaun, observa direitamente kondisoens no dezafius sira ne’ebé durante ne’e hasoru husi APC Munisipál.
“Ho vizita traballu ida ne’e ha’u hakarak rona direitamente preokupasaun imi bainhira atu hala’o ha’u nia knaar, ha’u foin simu posse hamutuk ho komandante no xefe departamentus sira no diretór balun sira, foin simu posse iha dia 19 Jullu I ha’u halo knaar foin ba fulan rua, faze primeiro ha’e hakarak vizita npara oinsa atu hadia situasaun servisu ninian ba ita hotu nia instituisaun APC ninia, nune’e ba oin ita bele servisu ho di’ak” dehan Sua-Exelénsia Prezidenti APC; Jesuino dos Reis Matos Carvalho.
Prezidenti APC ne’e mós hato’o agradese ba diretós sira ne’ebé akompaña hamutuk ho nia iha nia vizita ofisiál ida ne’e, ne’ebé asegura servisu lubuk ida hanesan mós estrutura APC iha baze, maske hasoru difikuldade.
“ Ha’u agradese ba ita sira ne’ebé hamutuk ho ha’u, sira mós matenek, hanesan mós ita boot sira, ne’ebé durante ne’e asegura servisu APC nian iha Munisípiu, imi hotu mesak ema ne’ebé matenek, ema ne’ebé badinas, ema ne’ebé hakarak fó kontribuisaun ba ita nia rain, mesmu ho kondisaun, rekursu limitadu, imi bele servisu aprezenta dadus, aprezenta resposta ne’ebé puru iha situasaun durante 24 oras” hatutan Prezidenti APC; Jesuino dos Reis Matos Carvalho.
Superior APC ne’e rasik reforsa nia pozisaun hanesan lideránsa másima ba Autoridade Protesaun Sivíl hakarak trata ema hanesan ema ho dignu.
“ Ha’u nia motto ne’ebé ha’u tama primeiro mai, ha’u sempre sama atensaun ba diretór no kolega sira hotu, katak ha’u hakarak trata ema hanesan ema, bainhira ita tau iha kondisaun di’ak, konsidera ita nia funsionáriu, trata sira ho di’ak, iha fatin no mahon ruma, iha transporte ne’ebé apoia sira nia servisu ne’ebé sei responde faze pur faze’ hateten Prezidenti APC; Jesuino dos Reis Matos Carvalho.
Iha vizita ofisál ne’e, Prezidenti APC Jesuino dos Reis Matos Carvalho ho Komandante Korpu Bombeiors Nasionál Paul Aníbal Maia tau mós pin APC ba Komandante APC Munisípiu Viqueque; Cerilo Soares Gomes nomós Komandante Korpu Bombeiros Munisípiu Viqueque; Amaro da Silva.
Vizita Prezidenti APC; Jesuino dos Reis Matos Carvalho hamutuk ho estrutura nasionál hare’e observa direitamente kondisaun sira hanesan; falta ekipamentus mobiliárius, meza ho kadeira ne’ebé limitadu, rekursu limitadu, transporte ne’ebé avaria, kondisaun fatin deskansa no edefísiu ne’ebé lafavorável, ransu ne’ebé ladún di’ak inklui hare’e rai ba konstrusaun edefísiu integradu APC iha futuru nune’e sei tau planu ba tinan 2025.
Vizita ofisiál Prezidneti APC ; Jesuino dos Reis Matos Carvalho akompaña husi Diretór Gabinete Planeamentu Estratéjiku no Asesoria; Paulo dos Santos Exposto, Diretór Gabinete Relasaun Externa no Komunikasaun ; Cesario da Silva Marques, Diretora Gabinete Inspensaun no Auditoria Inspetora; Odete Calado, Diretor Diresaun Nasionál Jestaun Rekursu; Virgilio dos Santos, Diretór Diresaun Nasionál Jestaun Risku Dezastre; Francisco Fátima da Cruz, Diretór Nasionál Bombeiros; Paul Aníbal Maia, Diretór Nasional ba Prevensaun no Mitigasaun; Carlos da Costa , Komandante Unidade Espesiál Protesaun Sivíl; Fernando da Costa
Média APC Viqueque “JsJ”